««Норма» деп үміттендік, бағасы таң қалдырды»

Әлеуметтік желіде Қарағандыда ашылған «Норма» супермаркетіне қатысты, әсіресе,  тұтынушылардың тауарға қойған бағаларына орай сұрақтар көбейді. 

Жаңа сауда орнының сөрелерінде күнделікті тұрмысқа қажетті азық-түлік пен тұрмыстық тауардың кең таңдауы бар. Әкімшіліктің басты мақсаттарының бірі – тұрғындарға сапалы өнімді ыңғайлы форматта ұсыну.

Ашылу күніне орай келушілерге түрлі жеңілдіктер мен акциялар ұсынылды. Дегенмен қала тұрғыны Жолаушы Толғанайдың айтуы бойынша:

–«Нормадағы» бағалар басқа супермаркеттерге қарағанда сәл қымбатырақ екен. Зейнеткерлерге жеңілдік болады деп еді, бірақ ол тек 12 мың теңгеден жоғары сатып алсаң ғана қолданылады екен. «Норма» деп үміттендік, бағасы таң қалдырды, – дейді ол.

Ал кейбір тұрғындар дүкеннің кеңдігі мен тауардың алуан түрлілігін оң бағалады.

– Жаңа ғана «Нормаға» барып келдік. Іші үлкен, күнделікті азық-түлік пен тұрмыстық тауардың таңдауы мол. Бағалары да жаман емес, бірақ Қазақстанда жалпы бағалар қымбат болғандықтан, бәрібір арзан деуге келмейді, – дейді Нұрай Сұлтанқызы.

Ашылу күні автобустардың толып кеткені де байқалды. Әсіресе Пришахтинск бағытындағы көліктер стадионға дейін лық толы болған. Соған қарамастан, дүкеннің ашылуы қаладағы бәсекелестікті күшейтіп, тұрғындарға таңдау мүмкіндігін ұсынды. 

Жамал АКПАРОВА