Моноопера Қарағандыда

Хакім Абайдың даналығы операда. 9 желтоқсан күні сағат 18:00-де «Шалқыма» коцерт залында «Толық адам. Ой толғау. Хакім Абай» атты моноопера өтеді. Қазақстанның халық әртісі, Қазақстан Республикасы Мем­лекеттік сыйлығының лауреаты, Д.Верди атындағы халықаралық сыйлықтың лауреаты, «Құрмет» және III дәрежелі «Барыс» ордендерінің кавалері, профессор Шахимардан Әбілов өнер көрсетеді.

Бұл кеште Абай Құ­нан­бай­ұлының өлеңдеріне жазылған ариялар мен романстар орындалмақ. «Толық адам. Ой толғау. Хакім Абай» монооперасы үш блоктан тұрады. Біріншісінде – «Қараңғы түн­де тау қалғып», «Қара­шада өмір тұр», «Қор болды жаным» және «Сегіз аяқ» шырқалады. Екіншісінде – «Ата-анаға көз қуаныш», «Бойы бұлғаң», «Біреуден біреу артылса», «Көзімнің қарасы» айтылады. Үшінші блокта – «Астана Опера» хор студиясының жас артистері өнер көрсетеді. «Айттым сәлем, Қаламқас», «Жел­сіз түнде жарық ай» ту­ындылары тыңдарманға бұ­рынғыдан өзгеше форматта ұсы­нылады.

Абай шығармалары күрделілігімен ерекшеленсе, бұл кеш сол күрделі туындыларды ерекше форматта тыңдарманға жеткізуді мақсат тұтып отыр. Уақыт қымбат заманда уақыт тауып келген жанның өкінбесі анық.

Ерік НАРЫН,
Ortalyq.kz