Үміткерде үш үй салынып жатыр
Бұдан бұрын жазғанымыздай,биыл Бұқар жырау ауданының алты аулында жеке тұлғалар өз күші мен қаражатына 40 пәтерлі тұрғын үйлердің құрылысын жүргізуде. Соның ішінде 2 пәтерлі 3 үй Үміткер аулында салынып жатыр.
Бұл үйлердегі әр пәтердің аумағы 80 шашы метрден тұрады да,ол салынып біткен күнде үй кезегіне тіркелген әлеуметтік осал топтағы адамдар мен отбасыларына берілмек. Сол үшін құрылыс салушылар оларды конкурсқа шығарып,аудандық әкімдік сатып алып, тиісті иелеріне табыстайтын болады.
Қазірде Үміткердегі үш үйдің құрылысы аяқталуға жақын. Мұнда жұмыс істеп жүрген құрылысшылар, арасында жергілікті жігіттер де бар, екі үйдің іргесін әуелі газды блокпен қалап, сосын сыртын қызыл кірпішпен өріп, төбесін жауып,енді үшінші үйді де сондай күйге келтіруде.
Одан әрі есік-терезелері орнатылған бұл үйлердің ішкі-сыртқы әрлеу,айналасын абаттандыру,қоршау ісі ғана қалады. Ол жұмыстарды құрылысшылар алдағы қыркүйек айының соңында тәмамдап,конкурс қорытындысында 6 үміткерлік баспаналы болатын түрі бар.
Ержан ИМАШ,
Бұқар жырау ауданы
