Өмірі өнерімен өнегелі еді
Доскей ауылдық кітапханасында ҚР “Білім беру ісінің үздігі”, ҚР “Мәдениет ісінің үздігі” Қанат Тайшыбайұлы Оспанов марқұмның туғанына 75 жыл толуына орай еске алу кеші өтті.
Зейнеткерлікке шыққанша көп жылдар Тәттімбет атындағы өнер колледжінде ұстаздық етіп,сондағы халық аспаптар бөлімінің меңгерушісі болған Қанат Тайшыбайұлы әріптесі Владимир Чекуновпен екеуі осы Бұқар жырау ауданының Көктал мен Доскей ауылдарынан музыка мектептерін ашқызып,оркестрлер құрылуына көп еңбек сіңірген болатын.
Қазірде Доскейдегі сол оркестрдің құрамында 20-25 адам өнер көрсетіп,кәсіби деңгейі көтерілген.Оның репертуарында қазақ күйші,композиторларының шығармаларымен қатар шетелдік композиторлардың классикалық туындылары да бар.
Кітапханада өткен кешті доскейлік оркестр өнерпаздары Е.Үсеновтің “Ерден толғау” күйімен ашып,А.Петровтің “Вальс” туындысын тамаша орындап,тыңдармандарды тәнті қылды.
Кезінде осы екі ауылда да әкім болған,қазір Бұқар жырау аудандық мәслихатының төрағасы Асхат Әли Қанат марқұм жайында жылы естелігінде музыка мектебінің ашылу және оркестрдің құрылу тарихымен бөлісті.Ал тағы бір көзкөрген,ол да Көкталда әкім болған,бүгінде Доскей әкімдігінің маманы Орынбала Николаевна Кәкеңнің анасы, туған-туыстары жөнінде,ал Доскей ауылдық округінің әкімі Рүстем Исайынов оның жақсы қасиеттері жайлы айтты.
Кеш барысында Қарағандыдан арнайы келген қарындасы Гүлденсін Шәмшіқызы,әке жолын жалғап,Тәттімбет колледжінде домбыра ұстазы боп жүрген қызы Айжан,інісі Саяттың қызы Жанар Қанат Тайшыбайұлының өмірбаянынан қызықты деректер мен оқиғаларды ортаға салып,өзі киген дирижерлік костюмін ауыл мұражайына әкеп,тапсырды.
Кәкеңнің шәкірттері Эльмира Сапарқызы,Ілияс Шабыкеев,әріптестері Сергей Гертер мен Бибігүл Уәлиханқызы ұстаздары хақында өз естеліктерімен бөлісіп,осы кешті ұйымдастырған кітапхана қызметкерлеріне ризашылықтарын білдірді.
Кештің нүктесін Кәкең сүйіп тыңдаған Шәмші Қалдаяқовтың “Кешікпей келем деп ең ” әні қойды .
Сонымен биылғы 15 қаңтарда туғанына 75 жыл толған Қанат Оспановқа арналған кештің өне бойында бейнероликтер көрсетіліп,кешке келгендер оған арналған “Өнерін өнеге еткен…” тақырыптық көрмесімен де танысты.
Ержан ИМАШ,
Бұқар жырау ауданы
Суреттер ұйымдастырушылардан
