Мемлекеттік аудит заңбұзушылықтарға тосқауыл қойды
Қарағанды облысы бойынша Ішкі мемлекеттік аудит департаменті 2025 жылдың бірінші жартыжылдығында мемлекеттік сатып алуларға жан-жақты талдау жүргізді. Осы кезеңде жалпы құны 668,6 млрд теңге болатын 17 352 лот қаралуға жоспарланған болса, оның ішінде 647,5 млрд теңгені құрайтын 17 057 лот аудитпен қамтылды.
Нәтижесінде, 1 697 лот бойынша, жалпы сомасы 68,2 млрд теңгеге тең бұзушылықтар анықталды. Аталған деректер негізінде 1 599 лот бойынша (57,2 млрд теңге) уәкілетті органдарға хабарламалар жолданды.
Жіберілген бұзушылықтарға байланысты келесі шаралар қабылданды:
• 163 хабарламаға сәйкес, мемлекеттік сатып алудың жылдық жоспарына өзгерістер енгізіліп, шарт жобалары кері қайтарылды;
• 292 хабарлама негізінде конкурстық (немесе аукциондық) құжаттамаларға түзетулер енгізілді;
• 1 103 хабарлама аясында мемлекеттік сатып алу шарт жасалғанға дейін жойылды;
• 41 жағдайда қорытынды хаттамалар хабарламаларға сәйкес келтірілді.
Аудит қорытындысы бойынша, Қазақстан Республикасы Әкімшілік құқық бұзушылық туралы кодексінің 462-бабының 3-бөлігін бұзған лауазымды тұлғаларға 13 әкімшілік хаттама толтырылып, материалдар сотқа жолданды.
Сонымен қатар, мемлекеттік сатып алу саласындағы бұзушылықтар үшін ҚР ӘҚБтК-нің 207-бабына сәйкес 10 әкімшілік хаттама толтырылды.
Қарағанды облысы бойынша Ішкі мемлекеттік аудит департаменті мемлекеттік қаражатты тиімді пайдалану, ашықтық пен заңдылықты қамтамасыз ету бағытындағы жұмыстарды жүйелі түрде жалғастырып келеді.
Аида РАХЫМҚҰЛОВА
