Осакаров ауданында 117 балаға материалдық көмек берілді
Жаңа оқу жылы қарсаңында елімізде дәстүрлі түрде өткізіліп келе жатқан «Мектепке жол» республикалық қайырымдылық акциясы биыл да жалғасын тапты. Бұл игі шараның басты мақсаты – әлеуметтік жағынан аз қамтылған, көп балалы отбасылардың жеткіншектеріне, ата-ана қамқорлығынсыз қалған балаларға қолдау көрсету, олардың мектепке толық дайын болуына жағдай жасау.
Осакаров ауданында аталмыш акция тамыз айының басында басталып, белсенді жүзеге асырылуда. Аудан көлемінде бірқатар нақты істер атқарылып, көмекке мұқтаж оқушыларға қажетті киім-кешектер мен оқу құралдары табыс етілді.
Аудан әкімі Руслан Нұрмұханбетов акцияға үн қосып, он оқушыға мектепке қажет құрал-жабдықтар мен рюкзактар сыйлады. Сонымен қатар, әкім мемлекеттік қызметшілерді, кәсіпкерлерді, аграрийлер мен меценаттарды осы қайырлы іске ат салысуға шақырды. «Бала – болашағымыз. Олардың алаңсыз білім алуына көмектесу – баршамыздың ортақ міндетіміз», – дейді аудан басшысы.
Акция шеңберінде барлық білім беру ұйымдарында арнайы ақпараттық бұрыштар ашылып, қайырымдылық көмекке мұқтаж отбасылардың дерекқоры жасалды. Әлеуметтік қолдауды қажет ететін балаларға көмек көрсету мақсатында мектептерде түрлі іс-шаралар ұйымдастырылуда.
Осакаров аудандық білім бөлімі мен құқық қорғау органдары бірлесіп, «Түнгі қаладағы балалар» атты он рейд жүргізді. Бұл іс-шаралар вокзалдарда, ойын-сауық орындарында өтті. Бір жақсысы, рейд барысында қараусыз жүрген балалар кездескен жоқ.
Сонымен қатар, аудандық басылымда осы акцияға орай арнайы мақала жарық көріп, меценаттарды қайырымдылық жасауға үндеді. Білім бөлімінің сайтында акция жайлы ақпарат орналастырылып, көмекке мұқтаж азаматтар мен балалар үшін сенім телефоны жұмыс істеп тұр.
25 тамыздағы жағдай бойынша акция аясында 117 балаға жалпы сомасы 1 586 000 теңге көлемінде материалдық көмек жасалды. Сонымен қатар, «Всеобуч» қоры арқылы әлеуметтік осал санаттағы 750 балаға қолдау көрсетілген.
Осакаров ауданы жаңа оқу жылын осындай игі істерімен қарсы алып отыр. Қайырымдылық – ізгіліктің белгісі. Мейірімге толы «Мектепке жол» акциясы жеткіншектерге жыл сайын қолдау көрсетіп келеді.
Болатбек ӘШІМҰЛЫ,
«Ortalyq Qazaqstan»
Осакаров ауданы
