Мәскеу мойындаған күш иесі

Шахтинск қаласының тұрғыны Дмитрий Именченков Мәскеуде өткен стритлифтинг X спортынан әлем чемпионы атанды. Ол WSF кезеңінде 25 келі салмақпен бірнеше рет тартылып, жеңіске қол жеткізді.

Еларалық жарысқа 37 елден 3500-ден астам қатысушы жи­налды. Біздің спортшы бұл бі­рін­­шіліктің қатарынан екі жыл же­ңімпазы атанғанын еске саламыз. Сонымен қатар, 21 жастағы спортшының қанжығасында екі дүркін Азия чемпионы атағы да бар.

– Стритлифтингпен 4 жыл болды айналысқаныма. Алғашында бұл спортқа қосалқы барып жүрдім. Кейін қалалық 1-2 жарыстарда жүлделі орынға ие болып, қызығушылығым арта түсті. Жалпы, қолдың жұмыс істеуіне, буындардың қатаюына таптырмас спорт. Ал, дайындығыма келсек, жеңіс жолында аз тер төккен жоқпыз. Соның арқасында, міне, жеңіске қол жеткіздік, – деп атап өтті жеңімпаз Дмитрий Именченков.

Аталмыш спорттан басқа, Дмит­рий мектепте дене шынық­тыру пәнінің мұғалімі болып жұ­мыс істейді. Сондай-ақ, ол – жеке фитнес жаттықтырушысы. Оның ай­туынша, мұның барлығы оған күнделікті өмірге деген құш­тарлығын оятады.

Жан АМАНТАЙ,
Ortalyq.kz