Мұраты биік білім ордасы
Дарындылар мен таланттыларға үлгілі орда болған Қарағанды «Bolashaq» жоғарғы колледжінің дәстүрлі «Болашақ жұлдыздары» фестивалі өтті. Шығармашыл жастарды марапаттап, студенттердің қоғамдық, спорттық жетістіктерін насихаттауды көздеді.
Колледж миссиясын анықтап, имиджін қалыптастырған уақыт ішінде жаңа мамандықтар ашылды. Оқу ғимараттары салынып, 10 000-нан астам маман дайындалды.
Сондай-ақ, колледжде мықты шығармашылық педагогикалық ұжым қалыптасып, тәжірибелі, өз ісіне берілген педагогикалық еңбек шеберлерімен қатар жас мамандармен толықты.
– Ұжымды біріктіру, кәсіби қызмет үшін жағдай жасау, әркімге жолын табуға және өзін танытуға мүмкіндік беру – колледждің басты ұстанымы. Білім ордасы тәуелсіз ел іргесін нығайтар жастарға білім берумен қатар, толықтай тәжірибе орнымен қамтып, олардың бәсекеге қабілетті маман иесі болуы жолында тер төгіп келеді. Осы бағытта колледж жұмысының ілгері жылжуына өз үлесін қосып келе жатқан әлеуметтік серіктестеріміз бар, – деді Білім беру ісінің құрметті қызметкері, колледж директоры Ғайни Мамраева.
Бүгінгі таңда колледж облыстағы ірі және танымал оқу орындарының біріне айналды. Ал, студенттер – облыстық, республикалық және халықаралық конкурстардың қатысушылары мен жеңімпаздары атанды. Фестивальдің негізгі идеясы да еңбекқорлығы, мақсаттылығы шығармашылығымен оқуда, қоғамда, спортта жетістікке жеткен және сол арқылы оқу орнының оң имиджіне үлес қосқан колледждің үздік студенттерін ұлықтауға арналды.
Колледждің «Жайдарман» үйірмесінен алғашқы сабақтарын алған түлектер де үлкен сахналарға шығып үлгерді. Биылғы оқу жылында облыстық «Student life» «Жайдарман» көңілді және тапқырлар сайысында «Dem – al» құрамасы ІІІ орынға ие болды. «Болашағы бар» жайдарман командасы «Маусымашар – 2025» республикалық креатив маусымында республикалық аймақтық лигаға жолдама алды. Фестивальде үздік командалар өнер көрсетіп, көрерменнің қошеметіне бөленді.
«Болашақ жұлдыздары» фестивалінде колледж студенттері өздерінің жан-жақтылығын көрсетті. Басым көпшілігі жастардан құралған ұжым өзгеріске ұмтылысын байқатты.
Аяулым СОВЕТ,
«Ortalyq Qazaqstan»