Әлихан мектебінде медиа сынып ашылды
Бүгін, еліміздің барлық білім ұйымдарында, күздің алғашқы күнімен бірге БІЛІМ КҮНІ мерекесі атап өтілді. Әлихан Бөкейхан мектебінде де алғашқы қоңырау үні сыңғырлап, бүлдіршіндер мектеп табалдырығын аттады. Атаулы күнге орай Әлихан Бөкейхан ауданының әкімі Досбол Құлекеев мектепке ат басын бұрып, ұстаздар мен оқушыларды құттықтап, мектептің жай-жапсарымен танысты.
Алғашқы қоңырау салтанатты жиыны өткен соң, 2024-2025 оқу жылының басты жаңалығы 5 – «медиа сыныбының» ашылу салтанаты өтіп, тұсауы кесілді.
– “Біртұтас тәрбие”бағдарламасының 6 бағытын негізге ала отырып, «Зияткерлік модернизация» жобасы аясында, оқушылардың кәсіби дағдысын дамыту, еркін пікірлеуге, тіл байлығын арттыруға баулу мақсатында ашылған бұл сыныпқа артылып отырған үмітіміз зор. Қарағанды облысында білім беруді дамытудың оқу-әдістемелік орталығы, Бөкетов Университеті және Әлихан Бөкейхан мектебі біргелікте келісім жасап, меморандумға отырды. Медиа сыныбының ашылуы ҚР Оқу-ағарту Министрлігі Тәрбие және қосымша білім департаментінің директоры, филология ғылымдарының кандидаты Меруерт Асқарбекқызы Медетбекованың онлайн құттықтауымен басталып, құрметті қонақтардың ақ тілегімен жалғасты. Мектебіміздің экс-басшылары Тілеуғалы Әміртайұлы, Өзібек Исатайұлы, ардагер-журналист Әли Тойжігіт, Сарыарқа телеарнасы, Бөкетов университеті, филология факультетінің деканы Елдос Түйте, журналистика кафедрасының меңгерушісі Гүлмира ханым, мектебіміздің журналистика мамандығын тәмәмдаған, оқып жатқан түлектері, ата-аналарымыз келіп жылы лебіздерін білдірді, – деп атап өтті мектеп директоры Айнұр Жаппарқұлова.
Аяулым СОВЕТ,
Ortalyq.kz
