Әлеуметтік әділеттілік сөзбен емес, іспен өлшенеді

Қоғаммен үнемі жұмыс істеп, мүгедектігі бар адамдарды қолдау мәселелерін терең түсінетін мүгедектігі бар адам ретінде мұндай нақты әрі айқын тұжырымдарды есту аса маңызды. «Бұл квота – әлеуметтік әділеттілік қағидатының айқын көрінісі» деген сөздер мыңдаған адам үшін осы тетіктердің шынайы мәнін дәл көрсетеді.

Күнделікті жұмыста қағаз жүзіндегі теңдік пен өмірдегі теңдік  екі бөлек ұғым екені анық байқалады. Алайда, Мемлекет басшысының квоталар «барлық қоғамдық-саяси өкілдерді» қамтитынын ерекше атап өтуі көңіл қуантады. Бұл мәселенің жай ғана формалдылық емес, қоғамның барлық топтарының шынайы қатысуы туралы екенін көрсетеді.

Сондай-ақ «бұл квоталарды өзгеріссіз сақтау қажет» деп нақты айтылуының маңызы зор. Қоғамның барлық санатындағы адамдар үшін бұл – тұрақтылық пен ертеңгі күнге деген сенімнің айқын белгісі. Бұл олардың қоғамдық-саяси өмірге қатысуы жағдайға немесе конъюнктураға тәуелді емес, керісінше, құндылық ретінде мойындалғанын білдіреді.

Қасым-Жомарт Тоқаевтың осы мәселедегі ұстанымы әлеуметтік әділеттіліктің жалпылама сөздер арқылы емес, нақты шешімдер арқылы іске асатынын көрсетеді. Мұндай көзқарас әрбір адам өзін қажет, тыңдалған әрі қорғалған сезінетін қоғамды қалыптастыруға мүмкіндік береді.

Нияз СУНДИТАЛИЕВ,
Қарағанды қалалық мәслихатының депутаты,
Қарағанды облысы әкіміне штаттан тыс кеңесшісі