Әлемнің атақты гроссмейстерлері – Қарағандыда
Қарағандыда шахматтан облыс әкімінің алғашқы Ашық Кубогы басталды. Қазақстан, Армения, Ресей, Үндістан, Швеция, Украина, Польша, Моңғолия, Испанияның ең мықты шахмат шеберлері қатысып жатқан халықаралық деңгейдегі осындай дүбірлі дода өңірде алғаш рет өтуде.
Атақты гроссмейстерлер: Арменияның екі дүркін чемпионы, шахмат олимпиадасының, Еуропа командалық чемпионатының жүлдегері, Португалия чемпионы Самвел Тер-Саакян, Еуропа клубтық чемпионатының алтын медалінің иегері, chessable кітабының және бірнеше курстардың авторы Александр Рахманов (Ресей Федерациясы), халықаралық жарыстардың жеңімпазы Адитя Миттал (Үндістан), Швеция, Украина чемпионы Виталий Сивук, қазақстандық Азия чемпионатының жүлдегерлері Денис Махнев, Әлішер Сүлейменов , сондай-ақ әлем чемпионатының жүлдегерлері Арыстанбек Оразаев, Алдияр Ансат ерлер арасында өзара мықтыны анықтамақ.
Қыздар арасында әлем, олимпиада чемпионы Юлия Осьмак (Украина), бес дүркін Еуропа чемпионы, блиц бойынша әйелдер арасында Еуропа чемпионы Ана Матнадзе Буджиашвили (Испания), екі дүркін әлем чемпионы, студенттер арасында әлем чемпионы Кляудя Кулён (Польша), Еуропа чемпионы Элина Даниелян (Армения), әлем чемпионатының жүлдегері, Батхуягийн Монгонтуул (Моңғолия) сынды шахмат шеберлері байрақты бәсекенің көрігін қыздырмақ.
– Әлемге әйгілі гроссмейстерлердің елімізге келіп, бақ сынауы тарихи оқиға десек болады. Өзіміз үшін биылғы жылдың қыркүйегінде Венгрияда өтетін Дүниежүзілік олимпиадаға дайындығымызды пысықтап алуға, қарсыластардың қабілет-қарымын анықтап алуға да зор мүмкіндік , – деді Қазақстан шахмат федерациясының вице-президенті Александр Бабенко.
– Егер қателеспесем, бұл менің Қазақстанға үшінші сапарым. Шақыруды алған кезде мен бірден келістім. Маған сіздердің елдің шахматта, әсіресе әйелдер шахматында өте дамып келе жатқаны ұнайды. Өзіңді жас ұрпақпен сынап көру әрқашан қызықты. Мен үшін бұл дүниежүзілік олимпиада алдындағы жаттығу, – деп бөлісті Армениядан келген қатысушы, халықаралық гроссмейстер Элина Даниелян.
Кубоктың ашылуында Қарағанды облысы әкімі аппаратының басшысы Ерлан Ғалиев құттықтау сөз сөйлеп, жарыстың үздіктерді анықтап қана қоймай, топ-гроссмейстерлер мен жаңадан бастаған шахматшылар арасында тәжірибе алмасуға мүмкіндік беретінін атап өтті.
Жарыстың жеңімпаздары мен жүлдегерлері ақшалай сыйлықтармен марапатталады. Жалпы жүлде қоры – 6 млн теңге. Нәтижелер 4 қыркүйекте жарияланады.
Ойындарды тікелей эфирде де көруге болады, бүкіл әлемге онлайн-трансляция https://idchess.com/.сайтында жүргізіледі.
Ілияс ДҮНГЕНБАЙҰЛЫ.
