Костенко шахтасында қаза тапқан 46 кеншіге ескерткіш орнатылды
Қарағандыда бүгін Костенко шахтасында өткен жылдың 28 қазанында апаттан көз жұмған 46 кеншіге арнап орнатылған ескерткіштің ашылу салтанаты өтті.
Ашылу салтанатына кеншілердің туыстары мен әріптестері, билік өкілдері, «Qarmet» компаниясының басшылығы көз жұмған шахтерлерді еске алып, гүл шоқтарын қойды.
– Костенко шахтасындағы қайғылы оқиға қарағандылықтардың ғана емес, барлық қазақстандықтардың жүрегінде терең із қалдырды. Бұл орны толмас қайғы. Қаза тапқандардың туыстары мен жақындарына шын жүректен көңіл айтқым келеді. Сол күндері Мемлекет басшысы жақындарынан айырылған отбасыларды қолдау үшін Қарағандыға жеке өзі келді. Біз әр отбасына қажетті қолдау мен көмек алуы үшін қолдан келгеннің бәрін жасадық. Елбасы біздің облысқа соңғы сапары барысында кеншілер үшін еңбек қауіпсіздігі мен лайықты жұмыс жағдайларын қамтамасыз етуге баса назар аудару керектігін тағы да қайталады, – деді Қарағанды облысының әкімі Ермағанбет Бөлекпаев.
Мемориалдың авторы қарағандылық мүсінші және суретші Игорь Баграмов.
Габбро қара граниттен жасалған ескерткіш белгісі кеншілердің кенжарға кетіп бара жатқанын білдіреді.
Үш метрге жуық құрылымда 46 қаза тапқан кеншінің есімдері ойылып жазылған. Айналасы абаттандырылған, шатырлары бар орындықтар орнатылған. Сондай-ақ, жарықтандыру жүйесіде бар. Периметрі бойынша 46 жас ағаш егілді.
Жақында Қарағанды қаласының орталық саябағында Костенко атындағы шахтада қаза тапқан кеншілерге тағы бір ескерткіш орнатылды. Оны мүсіншілер Игорь Баграмов пен Тарас Кишкарев жасады. Биіктігі үш метрден асатын ескерткіш кеншінің бейнесін бейнелейді. Ол 2006 жылы қаза тапқан кеншілерді еске алуға арналған ескерткіштің жанында орналасқан.
Материалды әзірлеген Аида РАХЫМҚҰЛОВА
