Конституция – Тәуелсіздігіміздің берік тірегі
Құрметті жерлестер!
Cіздерді 30 тамыз – Қазақстан Республикасының Конституциясы күні мерекесімен шын жүректен құттықтаймыз!
Биыл еліміздің Ата Заңының қабылданғанына 30 жыл толып отыр. Конституция – біздің мемлекеттілігіміздің негізі, ұлттық бірлік пен азаматтық келісімнің символы. Ол демократия мен заңның үстемдігін, әр адамның құқықтары мен бостандықтарын құрметтеу принциптерін анықтайды.
1995 жылғы 30 тамызда жалпыхалықтық дауыс беру арқылы қабылданған Конституция Қазақстан халқының әділ, құқықтық және әлеуметтік мемлекет құруға деген ұмтылысын нығайтты. Оның негізінде Отанымыздың қауіпсіздігін, дамуы мен өркендеуін қамтамасыз ететін институттар құрылды.
Негізгі заң елде жүргізіліп жатқан барлық қайта құрулар үшін сенімді негіз бола алды. Ата Заң азаматтық қоғамды жаңғыртуға, орнықты дамытуға және нығайтуға жол ашты. Оның ережелері тек заңды негіз ғана емес, сонымен қатар, еліміздің әр азаматы үшін бағыт-бағдар көрсететін құнды құжат.
Осынау салтанатты күні біз сіздерге зор денсаулық, амандық, бейбітшілік, келісім және Қазақстанның игілігі жолындағы адал еңбектеріңізге табыс тілейміз! Конституция біздің Тәуелсіздігіміздің берік тірегі және еліміздің жарқын болашағының кепілі бола берсін!
Қазақстан Республикасының Конституциясы күні құтты болсын!
Е.Бөлекпаев,
Қарағанды облысының әкімі
Н.Кобжанов,
Қарағанды облыстық мәслихатының төрағасы
