Шахтинскіде жобалау-сметалық құны 1 миллиард 790 миллион болатын денешынықтыру-сауықтыру кешенінің құрылысы 2019 жылы басталып 2022 жылдың қыркүйек айында пайдалануға берілген еді. Жалпы аумағы 6 266,5 шаршы метрді құрайтын екі қабатты нысан заманауи архитектуралық жобамен салынып, ондағы спорт залдар мен бөлмелер қажетті құрал-жабдықтармен жарақтандырылған.
– Кешен қалалық «Барыс» КМҚК филиалы болып табылады, – дейді оның басшысы Анарбек Жүнісов. Оның айтуынша, мұнда қаладағы балалар-жасөспірімдер спорт мектебі де орналасқан. Облыстық балалар-жасөспірімдер олимпиадалық резерв мектебінің бокс және жеңіл атлетика секциялары мен үйірмелері де жұмыс істейді.
Кешен сағатына 189, күніне 1 890 адамды қабылдау мүмкіндігіне ие. Келушілерге ұзындығы 25 метр 4 жолақты жүзу бассейні, тренажер, бокс, күрес, үстел теннисі, әмбебап ойын залдары мен 100 орындық конференция залы қызмет көрсетеді. Соның ішінде әмбебап ойын залында футбол, волейбол, баскетбол, жеңіл атлетикамен шұғылдануға болады. Ал кешеннің сырт аумағында жасанды жабынды төселген 3 спорт алаңы бар.
Шахтинск қалалық әкімдігі белгілеген қызмет ақысы да қымбат емес. Мәселен, ересектер әр сағаты үшін 500-550 теңге, ал балалар мен зейнеткерлер соның жартысын ғана төлейді екен. Көпбалалы отбасының балалары мен 7 жасқа дейінгі бүлдіршіндерге тегін. Аптаның жексенбісінде басқа күндері таңертеңгі 09:00- ден кешкі 21:00-ге дейін есігі ашық.
Шахтинскіде «АрселорМиттал» компаниясына қарасты 4 шахта бар екені белгілі. Соларда еңбек ететін кеншілердің кешенге келу ақысын төлеу көміршілердің «Қорғау» кәсіподағы мен филиал басшылығы арасында жасалған келісім негізінде жүзеге асырылатын көрінеді. Олар үшін аптаның 4 күніне арнайы жеке кесте жасалған. Бұл әмбебап және тренажер залдарына ғана қатысты. Қалған залдарына ақысын төлейді. Биылғы қаңтарда қол қойылған келісімнің күші әзірге үш ай мерзімге жетеді. Бұған қоса «АрселорМиттал» әкімшілігі өткен жылы 23-27 желтоқсанда осында 2010-2011 жылдары туған ұл-қыздары арасында шахтинскілік марқұм кенші Илгиз Сұлтанов атындағы баскетболдан дәстүрлі облыстық турнирдің 18-ші рет өтуіне демеушілік танытыпты. Ал оның алдында кешендегі спорт мектебінде грек-рим күресінен балалардың қалалық жарысын да өткізген. Алдағы уақытта да бұл жерде сан дүбірлі бәсекелер мен жарыстардың өтері анық.
Ержан ИМАШ,
ШАХТИНСК.
