Күлкі терапиясы
Сурет egemen.kz
Дәрігер науқасқа:
– Сіздің құрттаған тістеріңізді емдеу үшін, мына алтын тісіңізді жұлу керек.
– Неге?
Енді, емнің ақшасын кім төлейді?
***
Жұмысшы бастығына келіп: «Шұғыл түрде менің жалақымды көтеріңіз. Әйтпесе менің соңымнан қалмай жүрген фирмалар бар, мені таппай қалуыңыз мүмкін» дейді. Бастығы «Ол қандай фирмалар?» – деп сұрағанда, жұмысшы қалтасынан пәтер шығындарының квитанциясын шығарып: «Электр энергиясы фирмасы, газ фирмасы, су фирмасы, қоқыс шығару фирмасы т.б.» деген екен.
***
Автобусқа отырған бір оқушы кондуктордан екі билет сатып алады. Кондуктор одан: «Балақай неге екі билет алдың?» деп сұрайды. Оқушы: «Біреуін жоғалтып алсам, екіншісін көрсетемін» – деп жауап береді. Кондуктор: «Ал екіншісін жоғалтып алсаң ше?» дегенінде бала: «Онда менде «проездной» бар» деп қалтасынан бір айға арналған жол жүру билетін көрсеткен екен.
***
Бір ауылда бір шал бәрін мазақтап, бәрімен қалжыңдасады екен. Бір күні сол шалдың Ақтөс деген иті өліп қалады. Ауылдағы жігіттер жиналып:
– Біз де барып қалжыңдайық. Иті өлгеніне көңіл айтып барайық – дейді.
Жігіттер жиналып барса, шал есік алдында отыр екен.
– Ата, итіңіздің арты жақсы болсын! – деп жігіттер шалды құшақтап көңіл айтыпты. Сонда шал:
– Әй, кемпір, шай қой, Ақтөстің достары келді! – депті.
***
Бірде қалада оқитын студент ауылдағы үйіне былай деп хат жазып жібереді:
«Әке, маған дәптер-мәптер, бал-пал, киім-кешек алатын жүз мың теңге салып жіберіңізші».
Сонда әкесі жауап ретінде: «Балам, дәптер ал, – мәптерді қайтесің, бал ал, – палды қайтесің, киім ал, – кешекті қайтесің», – деп елу мың теңге салып жіберген екен.