Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында еліміздің инфрақұрылымын дамытуға аса мән беру керектігін баса айтқан болатын. Атап айтсақ, «Автокөлік жолдарының жай-күйі – өзекті мәселе. Мен бұл туралы осыған дейін де айттым. Ұзындығы 2,5 мың шақырымға созылатын облысаралық және ауданаралық жолдарды орта деңгейде жөндеуге арналған бағдарламаның мән-маңызы зор. Дәл осы жолдармен жұрт өте жиі жүреді. Сондықтан бағдарламаның ауқымын кеңейтіп, оған кемінде 10 мың шақырым жолды қамтуды тапсырамын» деген еді. Қазіргі уақытта көлік-логистикалық әлеуетін арттыру мақсатында өңірде ауқымды жобалар жүзеге асырылуда. Толығырақ тарқатайық…
Күрежол талапқа толық жауап берді
Өңірдегі жалпы жол ұзындығы – 9 332 шақырым. Оның 1 825 шақырымы – республикалық, 2 566 шақырымы – облыстық, 2 212 шақырымы – аудандық маңыздағы жол екен. Елдімекендер ішіндегі жолдардың жалпы ұзындығы – 2 729 шақырымды құрайды. Облыстық жолаушылар көлігі және автомобиль жолдары басқармасының басшысы Мақсұт Қожановтың сөзіне сүйенсек, биыл 1 032 шақырым көлік жолы жөнделеді. Яғни, оның 461 шақырымы – республикалық, 178 шақырымы – облыстық маңызы бар жолдар. Ал, 393 шақырымы – қалалар мен ауданаралық жол екен.
Былтыр өңірдегі көлік инфрақұрылымын жөндеу, реконструкциялау және салу жөніндегі ауқымды жобаларды іске асырудағы маңызды кезең болды. Олай дейтініміз, орталық және оңтүстік өңірлерді байланыстыратын ұзындығы 363 шақырымды құрайтын «Қарағанды-Балқаш» тасжолында толық жөндеу жұмыстары аяқталып, төрт жолақты жол толығымен ашылды. Бұл – мемлекеттік бағдарлама аясында қолға алынып, сәтімен аяқталған ірі жобаның бірі.
Күре жол I санатқа ие және төрт жолақтан тұрады. Қайта құру жұмыстары аясында 11 көпір, ауыл шаруашылығы техникасы өтетін 32 жол өткелі және көлік айрығы мен теміржол өткелдері де бар. Өткен жылдың соңында облыс әкімінің бірінші орынбасары Азамат Тайжанов пен «ҚазАвтоЖол» Ұлттық компаниясы» акционерлік қоғамы басқармасының төрағасы Дархан Иманашев төртжолақты жолды ресми түрде ашып, ел игілігіне берген болатын.
Енді биыл республикалық маңызы бар «Қарағанды-Жезқазған» автожолының 40 шақырымын қайта құрылымдамақ. Жолдың жалпы ұзындығы – 500 шақырым. Алайда, Қарағанды облысына тиесілісі – 160 шақырым екен.
Сонымен қатар, соңғы үш жылда «Қарағанды-Қарқаралы» автожолының 115 шақырым учаскесінде орташа жөндеу жұмыстары жүргізілді. Қалған 85 шақырым жолды жөндеу биылға қалып отыр. Нәтижесінде, Қарағандыдан Қарқаралыға дейінгі жалпы ұзындығы 200 шақырым автожол толық жөнделеді.
– «Қарағанды-Павлодар» автожолының 27 шақырымы, Молодежный кенті маңында орташа жөндеу жұмыстары жүргізілді. Қарағандының шығаберісінен орташа жөндеу жұмыстары былтырдан басталды. 30 шақырым жөндеу жұмысы биылға жоспарланған. «Астана-Нұра-Теміртау» жолының 7 шақырымы қайта өңделіп, асфальт жамылғысы төселді. Бүгінде жұмыстар әлі де жалғасуда. Облыстық маңызы бар 178 шақырым автожол жөндеуден өтті. «Осакаровка-Молодежный» автожолының 16 шақырымы, «Нұра-Осакаровка» автожолының 20 шақырымы реконструкцияланды, – деді Мақсұт Қожанов.
Өңірдегі оң өзгеріс берекеге бастайды
Былтыр ұзындығы 178 шақырым болатын облыстық маңызы бар автожол толық жөнделген. Атап айтсақ, 16 шақырымды құрайтын «Осакаровка-Молодежный» автожолында қайта жаңарту жұмыстары аяқталды. Әрі «Нұра-Осакаров» жолының 20 шақырымына қайта жаңарту жұмыстары басталған еді. Биыл жөндеу жұмыстары толық аяқталады деп күтілуде.
– Абай ауданында «Жартас-Долинка» автожолының 21 шақырымын реконструкциялау жалғасуда. «Саран-Шахтинск» автожолының 19 шақырымы күрделі жөнделуде. Шахан ауылынан Тентек шахтасына дейінгі 5 шақырым учаскеде негізі орнатылып, асфальттың төменгі қабаттары төселді. Биылға жоспарланған жұмыстар аяқталды, жоба 2025 жылы жалғасады. «Үштөбе-Кұрылыс» автожолының 9 шақырымын реконструкциялау жүргізілуде. Жоба 2025 жылы толық аяқталады, – деді басқарма басшысы.
«Теміртау-Токарев» автожолындағы Нұра өзені арқылы өтетін көпірді қайта жаңарту жалғасуда. Сондай-ақ, «Саран-Шахтинск» автожолындағы Шерубай-Нұра өзені арқылы өтетін көпір қайта жөнделді. «Қарағанды-Шахтинск» автожолындағы екі көпірді реконструкциялауға жобалық-сметалық құжаттама әзірленуде.
Әуежай әуехабқа айналады
Мемлекет басшысы өз Жолдауында әуежай хабтарын дамыту маңызы ерекше екендігін баса айтқан еді. Осы мақсатта елдегі әуежайлардың жүк тасымалдау мүмкіндіктерін кеңейту үшін барлық жағдайды жасауға тапсырма берді. Биыл «Сарыарқа» әуежайында мультимодальды аэрохаб «CargoHUB Karaganda» құру мәселесі пысықталып жатыр. Премьер-Министрдің бірінші орынбасары Роман Скляр тиісті жол картасын бекітті. Одан бөлек, басқарма басшысы «Сарыарқа» әуежайын дамыту мәселесі бойынша тиісті шаралар қабылданып жатқандығын баса айтты.
– Жалпы, бұл жоба «Сарыарқа» әуежайында жаңа кәсіпорындар құру арқылы жүк тасымалын арттыруға бағытталған. Болашақта өңделетін жүк көлемі жылына 15 мың тоннадан 200 мың тоннаға дейін ұлғайтылады деп күтілуде. Осы арқылы 2030 жылға қарай шамамен 2 000 жаңа жұмыс орнын құру және салықтық түсімдерді арттыру жоспарлануда, – деді Мақсұт Қожанов.
Әуе көлігі инфрақұрылымын дамыту бойынша Балқаштағы әуежай қайта жаңартылуда. Қазіргі уақытта №2 ұшу жолағын және әуежай перронын қайта жаңарту жұмыстары аяқталған. Жобаның жалпы құны – 3,8 млрд теңге. Биыл қыркүйекте Балқаш әуежайының ғимаратын қайта жаңарту жобасы кезек күтіп тұр. Ол үшін 3 млрд теңге қарастырылған. Аталған жобаларды жүзеге асыра отырып, әуежайдың жолаушы тасымалын сағатына 60-тан 80 адамға дейін ұлғайту көзделген.
Ербол ЕРБОЛАТ,
«Ortalyq Qazaqstan»
Суретті түсірген Жангелді ӘБДІҒАЛЫМ
