Көкпектіде – әдеби аялдама

Бұқар жырау ауданына қарасты Көкпекті ауылында ұлы ойшыл әрі ақын Абай Құнанбайұлының 180 жылдығына арналған әдеби аялдама орнатылды. Бұл тек қоғамдық көлік күтетін орын емес, заманауи мәдени-ағартушылық кеңістік саналады.

Аялдамада арнайы QR-код орнатылған. Оны сканерлеу арқылы Абайдың өлеңдерін оқуға, шығармаларының аудионұсқаларын тыңдауға, сондай-ақ оның өмірі мен шығармашылығы туралы тың деректермен танысуға болады.

Жобаның мақсаты — Абай мұрасын кеңінен насихаттап, жастардың ұлттық әдебиетке деген қызығушылығын арттыру.

Әдеби аялдама ауылдың инфрақұрылымын толықтырып қана қоймай, рухани-мәдени тәрбиенің маңызды бөлігіне айналды.

Аида РАХЫМҚҰЛОВА