Ізденіп жеткен мұратқа
«Болашақта IT саласы мамандарына сұраныс артады», – деді ел Президенті Қасым-Жомарт Тоқаев. Сондықтан, Мемлекет басшысы алдағы 3 жылда 100 мың жоғары білікті ІТ маман даярлау міндеті тұрғанын атады. Өз Жолдауында «Инновациялық инфрақұрылымды дамыту – еліміздің экономикалық тұрақтылығы мен жаһандық бәсекеге қабілеттілігінің аса маңызды кепілі» екенін атап өтті. Осы орайда кеншілер шаһарына білікті 10 000 ІТ маман тарту міндеті қойылды. Қазір аймақта 3 мыңға жуық IT-компаниялардың қызметкерлері бар.
Жақында Қазақстан бойынша алғаш ашылған қарағандылық IT-hub – «Террикон алқабында» қарағандылық оқушылар полициямен байланысуға арналған қосымшалар ойлап тапты. Осылайша қарағандылық жастар әзірлеген өнімдер әлем назарын аудартты.
Хакатонға қатысушылар полициямен байланысқа арналған MVP мобильді қосымшасын немесе интерактивті жаттығу платформасын бар-жоғы екі күнде әзірледі. Жеңімпаздар арасында студенттер мен тәжірибелі әзірлеушілер ғана емес, мектеп оқушылары да бар. Осы орайда хакатонды ұйымдастырушы – «Террикон алқабы» стартап-экожүйесінің мамандары үздік жобалар ақшалай сыйлықтарға ие болып қана қоймай, өз әзірлемелерін алға жылжытуға мүмкіндік алатынын айтқан.
– Қатысушылардың дайындық деңгейі мен олардың пайдалы технологиялар жасауға деген ұмтылысын көрдік. Біздің мақсатымыз – талантты әзірлеушілердің бастамаларын қолдау және оларға жобаларын дамытуға көмектесу.
Біз үшін әлемде Қарағандыға тең келер қала жоқ. Талантты, белсенді, іскер адамдарды бір қалада «Террикон алқабына» жинау – бұл күшті «кейс» болды. Цифрлық технологияға жақын жандар үшін жағымды кеңістік әрі тартымды нүкте жасау – зор маңызға ие. Біздің қалада Лондон, Нью-Йорк және Мәскеудегі коворкингтер мен акселераторлардан кем емес орта бар, – деп атап өтті «Террикон алқабының» директоры Сабыр Ниязов.
Хакатонның жарқын сәті – тәжірибелі әзірлеушілермен лайықты бәсекелесе алған оқушылардың қатысуы. Әрине жас таланттардың екі командасы ақшалай сыйлықтарға ие болып, еркін әңгімелесу алаңында өз ойларын ортаға салуға мүмкіндік алды. Мәселен, полициямен байланысуға арналған мобильдік қосымшаның жобасын ұсынған Қарағандыдағы Шоқан Уәлиханов атындағы мектеп-лицейдің сегізінші сынып оқушылары Артем Кузнецов пен Давид Дорошенко оған шұғыл қызметтермен байланыс, «ақылды» сағаттармен үндестіру және сенімді адамдарға өздерінің іс-әрекеттері туралы ақпаратты беру мүмкіндігі сияқты қызметтерді қосты.
– Бізге жеңімпаздар ретінде 100 мың теңге берілді. Бұл – үлкен демеу. Бастапқыда ересек әзірлеушілермен бәсекеге түсе аламыз деп ойлаған жоқпыз. Бірақ байқап көрдік. Алдағы уақытта жобаны жетілдіріп, жаңа жарыстарға қатысқымыз келеді, – деді Артем Кузнецов.
Ақпараттық технологиялар мектеп-лицей-интернатының тоғызыншы сынып оқушыларынан құралған тағы бір мектеп командасы көрермендер көзайымы сыйлығын және 100 мың теңгені иеленді. Шайзада Такуадина, Ерасыл Төкен, Абдулла Сағынтай, Ернұр Қалел және Ахметжан Әділхан түрлі рөлдерге еніп (азамат, полиция қызметкері және т. б.), құқық қорғау органдарымен жасырын қарым-қатынас жасай алатын, өзекті жаңалықтарды оқып, полициямен сұхбат жүргізетін қосымша әзірледі.
Ал, Ерасыл Базарбаев, Алинұр Толбаев, Айжас Серіков және Әлімжан Жорабектен тұратын №23 команда полицияның халықпен байланыс жасайтын мобильдік қосымшасын әзірлеуде бас жүлдені жеңіп алды. Оқушылардың Qalqan жобасы – оқиғалардың интерактивті картасын, жоғалған адамдарды іздеу жүйесін, полициямен сөйлесуді және тіпті Amber Alert механизмін қамтитын қауіпсіздікті қамтамасыз етуге арналған сандық экожүйе. Команда өз жұмысы үшін 300 мың теңгені жеңіп алды.
Оған қоса, Максим Яковлев, Кирилл Бушманов және Әлібек Тәуірбаев бас біріктірген №10 команда SOS түймесі, жаңалықтар таспасы және өтінімдер жүйесі бар клиенттік мобильді қосымшаны әзірлепті.
Интерактивті жаттығу платформасын әзірлеуде бірінші орын мен 300 мың теңге көлеміндегі сыйлықты №52 командадан Аңсар Есмұханов пен Әділет Самұрат алды. Олар құқық қорғау органдарының қызметкерлеріне тренажер бола алатын 3D ойын әзірледі. Ал, екінші орын мен 200 мың теңге Тәлім Аушахман, Ерасыл Сатымбеков, Санжар Каменов, Арсен Исмаилов, Заңғар Манарбектен құралған №50 командаға бұйырды. Олар жасанды интеллект интеграциясы бар VR ойын-тренажер жасады.
– Жастардың жобалар ойлап табудағы ізденісін жоғары бағалаймыз. Зияткерлердің ерекше ортасына айналған «Террикон алқабына» шақырамыз. Алқапты тамашалаған адамның кеткісі жоқ. Білім беру форматы өзгеше болғандықтан, білікті жастар әлемнің түпкір-түпкіріне қанат қағуда.
Мәселен 27-30 аптаға созылатын Python, PHP, Android қосымшаларын Kotlin бойынша әзірлеу курстарынан іс жүзінде 100-ге жуық білімді жасөспірім дайын болады деген сөз, – деп атап өтті Сабыр Ниязов.
Аяулым СОВЕТ,
«Ortalyq Qazaqstan»
Сурет облыс әкімдігінің сайтынан
