Бүгінде қазақ әйелі отбасы, ошақ қасындағы қызметінен бөлек, билікте бой көрсетіп, бизнесті де бағындырып үлгерді. Қоғамның қай саласында болмасын, қыз-келіншектердің әлеуеті артуда. Облыс аумағында қызметі мен әлеуметтік бағытына қарамастан еңбек ететін әйелдердің мәртебесі мен имиджін арттыру мақсатында құрылған бірқатар ұйым бар. Солардың бірі – Іскер әйелдер қауымдастығы. Қазақстан бойынша барлық өңірде филиал ашқан қауымдастық 30 жылға жуық уақыт жұмыс істеп келеді.
Іскер әйелдер қауымдастығы 1995 жылы жұмыс істейтін әйелдердің мәртебесі мен имиджін көтеру мақсатында құрылған. Бүгінде ел аумағында іскер әйелдер қауымдастығының 20-дан астам филиалы жұмыс істейді. Аталған қауымдастық біздің Қарағанды облысы бойынша да қарқынды жұмыс жасап отыр. Әсіресе, Қарағанды, Теміртау, Саран қалалары мен Осакаровка кентінде белсенділік көрсетілуде.
Жақында облыстық іскер әйелдер Балқаш қаласына келіп, мұндағы іске бейім, кәсіпке икемі бар нәзік жандармен кездесті. Бұл сапардың басты мақсаты – Балқаштағы іскер әйелдер қауымдастығын жандандыру. Жүздесу барысында «Қарағанды облысының іскер әйелдер қауымдастығы» қоғамдық бірлестігінің төрағасы Наталья Арыстанова қауымдастықтың жұмысы мен жетістіктері жайлы баяндады. Бұған қоса, кездесуде іскер әйелдер қауымдастығының Балқаш қаласындағы филиалын жандандыру мәселесі де талқыланды. Қауымдастық төрайымы балқаштық қыз-келіншектердің сауалдарына толыққанды жауап берді.
Рас, елімізде әйелдердің әр салада қалыптасуына барлық жағдай жасалған. Мемлекеттік саясат тек ана мен баланы қорғауға ғана емес, сонымен қатар, әйелдердің кәсіпкерлік бастамасын жүзеге асырып, жан-жақты дамытуына да бағытталған.
Нұрдос КӘРІМ,
БАЛҚАШ
Ortalyq.kz
