Инва орталық көмекке дайын
Қарағандыда мүгедектер арбасын жөндеу және қызмет көрсету бойынша алғашқы инва қызмет көрсету орталығы ашылды. Енді проблемалар туындаған жағдайда сырттан маман іздеудің қажеті жоқ. Қызмет көрсету орталығында олар қажет нәрсенің бәрін тегін жасайды. Егер жөндеу кешіктірілсе, олар уақытша пайдалануға басқа арба береді.
– Мүмкіндігі шектеулі жандарға арналған мүгедектер арбалары – мобильді болуға мүмкіндік беретін жалғыз көлік құралы. Егер ол бұзылса, айтарлықтай қиындықтар туындайды. Бұрын маған арбамның электронды бөлшектерін жөндеу үшін оларды Ресейге жіберуге тура келетін. Бұл ұзаққа созылып, ыңғайсыздық тудыратын. Кішігірім жөндеу жүргізу керек болса, көбіне дәнекерлеушілерге немесе шиномонтаж шеберлеріне жүгінетінмін. Бірақ, барлығы дерлік келісе бермейді, – дейді облыс әкімінің мүгедектігі бар адамдар мәселелері жөніндегі кеңесшісі Нияз Сүндетәлиев. – Өткен жылы мүгедектігі бар адамдардың атынан мен аймақ басшысы Ермағанбет Бөлекпаевқа қалада сервистік орталық ашуды өтініп, жүгінген болатынмын. Міне, біздің өтінішімізге құлақ түрді. Енді біз мұнда жөндеуге келеміз немесе шеберді үйге шақыра аламыз.
Сервистік орталық жыл сайын 300-ге дейін мүгедектер арбасын жөндейді. Ақауларды анықтап, дереу жөндеумен айналысады. Сондай-ақ, шеберханада құрғақ тазалауға, я жаңа орындық тігуге тапсырыс беруге болады. Кеңес берушілер арбаға қалай күтім жасау керектігін және оның қызмет ету мерзімін ұзартуды үйретеді. Инва ТҚКО мемлекеттік-әлеуметтік тапсырыспен жұмыс істейді.
– Қызмет көрсету орталығында мүгедектігі бар адамдар арбасыз қалудың қандай болатынын өз басынан өткерген, мүмкіндігі шектеулі шеберлер жұмыс істейтін болады. Біз барлығы 12 адамды жинадық, оның сегізі – мүмкіндігі шектеулі жандар. Жөндеу мен техникалық қызмет көрсетуден бөлек, бізде арбаны дұрыс таңдау қызметі де бар. Сондай-ақ, мамандарымыз қажет болған жағдайда клиенттерге цифрлық қызметтерді алуға көмектеседі. Бұл біздің екінші филиалымыз, біріншісі сегіз жыл бұрын Астанада ашылған, жақсы жұмыс істеп жатырмыз, – деді «ДОС» Тәуелсіз өмір» қоғамдық бірлестігінің төрағасы Дина Есілдинова.
Ашылу салтанатында сыйлықтар да болды. Сервистік орталықтың құрылтайшылары параармрестлингтен әлем чемпионы Никита Ермаковқа және ерекше баланың анасы Гүлизар Ахметоваға екі заманауи мүгедектер арбасын табыс етті.
– Мен жалғызбасты анамын. Батыр есімді 12 жастағы ұлымды тәрбиелеп отырмын. Бала кезінен сал ауруымен ауырады. Жақында біздің кіреберісте тұрған қымбат арбамызды бүлдіріп кетті. Мен бұл туралы әлеуметтік желілерде жаздым, көптеген жақсы адамдар қол ұшын созуға дайын екенін айтып жатты. Есімін айтқысы келмеген бір меценат бізге серуендеуге арналған жаңа арба сыйлады. Ал, бүгін қоғамдық бірлестік бізге үйде қолданатын тағы бір арба сыйлады, – деді Гүлизар Ахметова.
Жансая ОМАРБЕК,
Ortalyq.kz
