Халықаралық марафонда бақ сынады
Қарқаралылық шаңғышы Думан Бейсенаев әлемдік деңгейдегі Engadin Ski Marathon шаңғы марафонына қатысқан жалғыз қазақстандық болып отыр. Ол негізгі жүгіруде 14 мың қатысушыдан 700-ші болып, 2 сағат 2 минутта мәре сызығын кесіп, былтырғы нәтижесін жақсартты.
Engadin Ski Marathon – коньки стиліндегі көп сұранысқа ие шаңғы марафонының бірі. 14 және одан жоғары жастағы 18 мыңға жуық адам қатысатын марафон әлемдік беделді жарыстардың үштігіне кіреді. Атауы Швейцариядағы Энгадин (Engadin) алқабының құрметіне қойылған.
Негізгі бағытының ұзындығы – 42 шақырым. Марафон Энгадин алқабының жоғарғы нүктесі – Малоя қаласында басталады. Ал, мәре – Шчанф қалашығы маңында. Думан Бейсенаев бұл қашықтықты 2 сағат 2 минутта жүріп өтіп, Италиядағы жүгірумен салыстырғанда уақытын 8 минутқа жақсартты.
– Тік жардағы жолдардан түсу кезінде қашықтықтың 12-ші шақырымында үйіндіге кез болып, аяғымды зақымдадым. Қатты жарақаттанбасам да, бәсеңсіп қалдым, – дейді марафоншы.
Есесіне, Engadin Night Race түнгі жарысында 17 шақырым қашықтықта 2 мың қатысушының ішінен 21-ші болып, өзінің үздік нәтижесін көрсетті.
Думан бұл сынақтың өте ерекше және экстремалды болғанын, жарыстың жоғары деңгейде ұйымдастырылғанын да атап өтті.
– Шаңғыны талапқа сай етіп дайындау керек. Көптеген елдерде құрамында фторы бар жағармайларға тыйым салынған, олар жылдамдыққа өте жақсы көмектеседі. Алайда, экологияға теріс әсер етеді. Сондықтан, жарыс алдында барлық шаңғышы сынақтан өтеді, – дейді Думан.
Думан Бейсенаевтың есебінде барлығы 12 халықаралық марафон бар.
Жәлел ШАЛҚАР,
«Ortalyq Qazaqstan»
