Грантпен мүмкіндік молайды
Қарағанды облысында 2021-2025 жылдарға арналған кәсіпкерлікті дамыту жөніндегі Ұлттық жоба бойынша 212 грант бөлінді. Мемлекеттің қолдауына халықтың әлеуметтік аз қамтылған топтары ие болғанын ерекше атау керек.
Облыстың жұмыспен қамтуды үйлестіру және әлеуметтік бағдарламалар басқармасының мәліметі бойынша 92 көпбалалы отбасы, 65 мүмкіндігі шектеулі жан, ерекше бала тәрбиелеп отырған 28 адам, 12 АӘК алушы грант иеленген. Сонымен қатар, бір қоныс аударушы және асыраушысынан айырылған 14 отбасы осы қатарда.
«Бастау Бизнес» жобасы аясында 4 565 адам кәсіпкерлік негіздері бойынша оқытудан өтті. Мәселен, Саран қаласының тұрғындары Дмитрий Ким мен Наталья Панусенко грантпен өз-өзіне қызмет көрсететін автокөлік жуатын орын ашып, құс өсіруде.
Грант алғандар бүгінде бағыттары бойынша іске кіріскен. Ерекше балаларға арналған қазақ тілінде оқытатын кабинет, жұмыс қолғаптарын, этникалық үлгідегі киімдер мен жиһаздарды, қасбеттік термопанельдер жасау цехын, автосервис, кондитерлік, баспахана ашты. Қымыздан балмұздақ, блок бетон және полистиролбетон бұйымдарын шығаратын цехтарды, бөдене фермасы, ветеринарлық дәріхана жұмыс істеп тұр.
Жұмыссыздарды жұмысқа орналастыру – Ұлттық жобаның негізгі бағыты. Осы жылы «Жастар практикасы» санаты бойынша 816 адам жұмыс орындарына ие болды.
«Күміс жас» жобасы да тұрғындар арасында сұраныста. Жобаға 1 197 адам қатысты. Ол зейнеткерлік жасқа дейінгі адамдар үшін жұмысқа орналасуға мүмкіндік береді.
Жобаның арқасында қарағандылық Толқын Қоспабаева мен Алтынай Сейілова жеке компанияларда ресепшионист-маман және клиенттермен жұмыс жөніндегі менеджер ретінде жұмыс тапты.
Өңірде мүгедектігі бар адамдарды жұмысқа орналастыруға да ерекше көңіл бөлінуде. Биыл аталған Ұлттық жоба бойынша 12 арнайы жұмыс орны құрылды. Олар жұмыс берушілерді субсидиялау арқылы ұйымдастырылады. Субсидия арнайы жұмыс орындарына жабдық сатып алу, монтаждау және орнату шығындарын өтеу, мүгедектігі бар адамдарға жалақы төлеу үшін беріледі.
Өз тілшімізден
Суретті түсірген Жангелді ӘБДІҒАЛЫМ
