Футболсүйер жастардың турнирі мәресіне жетті
2018 жылдан бері Қарағандыда Балапан Әбеновті еске алуға арналған шағын футболдан облыстық ашық біріншілік турнир тұрақты түрде өткізіліп келеді. Күні бүгінге дейін футболсүйер жастардың басын қосып, дәстүрден жаңылмады. Биылғы турнирдің ауқымы кеңейіп, республикалық деңгейде өткізілуде. Алғаш рет ел көлемінде 2012-2013 жылы туған жасөспірімдер арасындағы ұйымдастырылып, оған елдің түпкір-түпкірінен 24 команда қатысты. Турнир қорытындысы бойынша елордалық «Спарта» командасы ел чемпиондары атанды.
Турнирдің жабылу салтанатына Парламент мәжілісінің депутаты Құдайберген Бексұлтанов, Қазақстанның Еңбек сіңірген қайраткері Рымбала Омарбекова және тағы басқа да құрметті қонақтар қатысып, жылы лебізін білдірді.
– Бұл турнир бұған дейін облыстық деңгейде ұйымдастырылып еді. Биыл республика деңгейіне көтерілді. Осы турнирдің отын өшірмей, дәстүрге айналдырған барша жанашыр жандарға алғысымды білдіремін. Бұл турнир кімге арналып отыр? Мәселе сонда. Себебі, мұндай ауқымды бәсеке бәз біреулерге арналып өткізіле бермейді. Ал, елі үшін туған Балапан Зипатоллаұлы секілді азаматтың есімін ел жадында сақтау мақсатында өткізуі – заңдылық деп білемін. Менен «Кімнен үлгі алу керек?» деп сұраса, осы азаматтың есімін ойланбай айтар едім, – деді Рымбала Кенжебалақызы.
Биылғы жарысқа қатысқан командалар турнирдің арнайы ережесіне сай екі топқа бөлген. Ал, әр топта төрт командадан жасақталды. Сәйкесінше, әр команда өз тобында үш кездесуден өткізіп, бар шеберлігін ортаға салды. Топтық кезең қорытындысы бойынша жоғары ұпай жинаған екі клуб 1/16 финалға жолдама иеленген. Одан кейін дода мәресі қыза түсті. Әр кезеңде жеңіске жеткен команда келесі айналымға өтіп отырды.
Турнир қорытындысы бойынша елордалықтар І орын иеленді. ІІ орынға «Жаңаарқа 2012» командасы еншілесе, қарағандылық «Жастар қыран» клубы үздік үштікке енді.
Мақаланың толық нұсқасын газеттің алдағы санынан оқи аласыздар.
Ербол ЕРБОЛАТ
Ortalyq.kz
