Ермағанбет Бөлекпаев Новгород облысының делегациясымен кездесті
Новгород облысы Қазақстанмен ынтымақтастықты дамытуға қызығушылық танытып отыр. Қарағанды облысына Новгород облысы губернаторының бірінші орынбасары Евгений Богданов бастаған делегация келді. Өңір басшысы Ермағанбет Бөлекпаевпен кездесуде сауда-экономикалық және мәдени-гуманитарлық салалардағы өзара іс-қимыл мүмкіндіктері талқыланды.
Евгений Богдановтың айтуынша, делегацияға трансформаторлар, мұнай-газ өнеркәсібіне арналған жабдықтар, шыныдан жасалған өнімдер шығаратын, сондай-ақ ауыл шаруашылығы саласында жұмыс істейтін компаниялардың өкілдері кірді.
– Біз үшін өңірлер деңгейіндегі ынтымақтастық маңызды. Қарағанды облысы – ірі өнеркәсіптік өңір. Новгород облысының экономика құрылымында өңдеу өнеркәсібі басым, сондықтан біз сіздердің тәжірибелерңізге қызығушылық танытамыз, – деп атап өтті Евгений Богданов.
Ол сондай-ақ білім беру саласындағы ынтымақтастықтың әлеуеті зор деп санайды. Делегация құрамында Новгород мемлекеттік университетінің ректоры келді.
– Біз әрқашан өзара тиімді ынтымақтастыққа дайынбыз. Өзара әрекеттесу нүктелерін табуға болады, – деді Ермағанбет Бөлекпаев.
Аида РАХЫМҚҰЛОВА,
Ortalyq.kz
