Енді еліміздегі құрылыс компаниялары салынып бітпеген үйлерін жарнамалай алмайды
Қазақстан Парламентінің Мәжілісі «Кейбір заңнамалық актілерге құрылыс саласын жетілдіру және тұрғын үй құрылысына үлестік қатысу мәселелері бойынша өзгерістер мен толықтырулар енгізу туралы» заң жобасын екінші оқылымда қабылдап, Сенаттың қарауына жіберді.
Бұл құжат үлескерлердің құқықтарын қорғауға, тұрғын үй нарығындағы алаяқтық схемаларды азайтуға және құрылыс компанияларының жауапкершілігін арттыруға бағытталған.
Алдын ала келісімдер мен жарнамаға шектеу
Заң жобасында тұрғын үй құрылысына үлестік қатысу туралы заңнаманы айналып өту мүмкіндігін болдырмау үшін бірқатар шектеулер қарастырылған. Атап айтқанда:
• Алдын ала шарттар, пәтерді брондау немесе инвестициялау шарттарын жасауға тыйым салынады;
• Егер жергілікті атқарушы орган рұқсат бермесе немесе тұрғын үй құрылысының бірыңғай операторының кепілдігі болмаса, онда салынып жатқан тұрғын үйді жарнамалауға тыйым салынады;
• Мұндай объектілерден ипотека арқылы пәтер сатып алуға да тыйым енгізіледі.
Бұл шаралар заңсыз үлестік жобаларды тоқтатуға және азаматтардың қаржылық қауіпсіздігін қамтамасыз етуге бағытталған.
Қолма-қол ақша және шарттардағы нақты деректерге талаптар
Енді құрылыс салушыларға үлестік қатысу негізінде пәтер сатқан кезде қолма-қол төлем қабылдауға тыйым салынады. Бұл шешім қаржы қозғалысының ашықтығын қамтамасыз ету үшін қабылданды.
Сонымен қатар, үлескерлермен жасалатын шарттарда міндетті түрде:
• Рұқсаттың нөмірі мен
• Берілген күні көрсетілуі тиіс.
Бұл талап құжаттардың заңдылығын тексеруді оңайлатып, үлескер мен құрылыс компаниясы арасындағы қатынасты заңды деңгейге шығарады.
Әкімшілік жауапкершілік күшейтіледі
Енді рұқсатсыз үлескерлерден ақша тартқан құрылыс салушылар мен жарнама тыйымдарын бұзған тұлғаларға қатысты әкімшілік жауапкершілік енгізіледі. Бұл ереже құрылыс саласында тәртіп орнатуға және алаяқтықтың алдын алуға бағытталған.
Заң қолданылу аясы кеңейеді
Мәжіліс мақұлдаған түзетулерге сәйкес, «Тұрғын үй құрылысына үлестік қатысу туралы» заңның қолданылу аясы аз қабатты тұрғын үйлерге де таралады. Бұл жеке тұрғын үй құрылысын да бақылауға алуға мүмкіндік береді.
Аида РАХЫМҚҰЛОВА
