Енді елімізде МӘМС есебінен жеке клиникада ем алуға болады

Мемлекеттік ауруханада қызмет немесе тексерістен өте алмаған науқастарды жеке клиникаларға жіберіп, шығынды міндетті әлеуметтік медициналық сақтандыру (МӘМС) қаражаты есебінен өтеу қарастырылуда.

Соңғы жылдары медициналық қызметтердің құны өсіп, ал оған қолжетімділік айтарлықтай төмендегенін мәжілісмендер бұған дейін денсаулық сақтау министріне жолдаған сауалында көтерген еді. Депутаттардың сөзінше, науқастар апталап, кейде айлап талдау тапсыра алмай, КТ, МРТ және өзге де тексерулерден өте алмай жүр. Соның салдарынан адамдар ақылы түрде тексерілу үшін жекеменшік клиникаларға баруға мәжбүр.

Парламент мүшелері мемлекеттік медициналық ұйымдар қызмет көрсете алмаған жағдайда, науқастарды жеке клиникаларға жолдап, оның шығынын МӘМС арқылы өтеуді ұсынған.

Денсаулық сақтау министрлігінің жауабына сүйенсек, егер клиника 10 күн ішінде науқасқа қажет қызметті көрсетпесе, пациент еш қиындықсыз басқа медициналық ұйымды таңдай алады.

Сонымен қатар азамат қордың жеткізушілер тізімінде тұрған кез келген клиниканы таңдай алады, ал жолдама рәсімдеу кезінде клиникамен келісімшарт ақпараттық жүйеде автомат түрде жасалады.

Министрлік мемлекеттік клиникада қызмет алу мүмкін болмаған жағдайда, пациентті жеке медициналық мекемеге жіберу және оның шығынын МӘМС қоры арқылы өтеу тетігін әзірлеп жатқанын мәлімдеді.

Егер азамат кезекке ілінбей, жолдама ала алмай жүрсе, денсаулық сақтау министрлігі МӘМС қорының байланыс орталығына немесе Qoldau 24/7 мобильді қосымшасына жүгінуге кеңес береді.

Материалды әзірлеген Аида РАХЫМҚҰЛОВА