Елімізде жаңа қоғамдық диалог алаңы – Халық Кеңесі құрылады
Қазақстанда жүргізіліп жатқан реформалардың жаңа кезеңінде қоғамдық дамудың барлық мәселелері бойынша тұрақты түрде жалпыхалықтық диалог өткізетін кең әрі тиімді алаң қажет. Осыған байланысты елде жаңа қоғамдық-саяси институт – Қазақстанның Халық Кеңесін құру ұсынылды. Бұл туралы Ұлттық құрылтайдың V отырысында Мемлекет басшысы Қасым-Жомарт Тоқаев мәлім етті.
Жаңа платформа қоғамдағы бірлік пен ынтымақты нығайтуға үлес қосатын негізгі қоғамдық-саяси бірлестіктер мен құрылымдарды біріктіреді. Осы тұрғыдан алғанда, Қазақстан халқы Ассамблеясы мен Ұлттық құрылтайдың тарихи маңызы бар миссиялары өз міндетін табысты орындады деп бағалануда.
Ұсынылып отырған Халық Кеңесі бұрынғы институттардың стратегиялық сабақтастығын сақтай отырып, қазақ мемлекеттілігін және Қазақстан Республикасының Тәуелсіздігін жүйелі түрде нығайтуды басты мақсат етеді. Сонымен қатар, жаңа орган шетелдік кеңесші құрылымдардың озық тәжірибесін бойына сіңірген жаңа мемлекеттік институт болмақ.
Халық Кеңесінде еліміздегі барлық этностардың, әлеуметтік топтардың және өңірлердің өкілдігі қамтамасыз етіледі. Ол елдің жоғары консультативтік органы мәртебесіне ие болады.
Кеңес құрамын 126 адамнан қалыптастыру ұсынылып отыр. Оның ішінде:
• 42 мүше – этномәдени бірлестіктерден,
• 42 мүше – ірі қоғамдық ұйымдардан,
• 42 мүше – мәслихаттар мен өңірлік қоғамдық кеңестерден ұсынылады.
Халық Кеңесінің барлық мүшесін Президент тағайындайды, ал Кеңес төрағасы оның мүшелері тарапынан сайланады. Төрағаның екі орынбасары болады, олар ротациялық негізде қоғамдық тәртіппен тағайындалады. Сонымен қатар, Кеңестің хатшылығын басқаратын жетекші бекітіледі.
Жаңа институттың құрылуы қоғам мен мемлекет арасындағы ашық диалогты күшейтіп, ел дамуының стратегиялық бағыттарын талқылауда маңызды рөл атқарады деп күтілуде.
Аида РАХЫМҚҰЛОВА
Ortalyq.kz
