Қарағанды өнер ұжымдары Омандағы фестивальде өнер көрсетті

Тәттімбет атындағы қазақ халық аспаптар академиялық оркестрі мен «Ақ­қу» фольклорлы-хореографиялық ансамблінің Оман Сұлтанатына гас­трольдік сапары өтті. Өнер сапары 3 қаңтарда басталып, 11 қаңтарда аяқталды.

Ұжымдар араб әлеміндегі ең көрікті қалалардың бірі – Маскат қаласындағы Корольдік опера театрында ұйымдастырылатын Әлемдік музыка және би фес­тиваліне ресми шақырту алған еді. Бұл мәдени іс-шара халықтар арасындағы мәдени алмасу мен өзара рухани байы­тудың маңызды алаңына айналған. Фестивальге 5 мемлекеттен шығарма­шылық ұжымдар қатысуда. Бахрейн, Мек­сика, Венгрия, Оман және Қазақс­тан.

Белгілі әнші, Қ.Байжанов атындағы концерттік бірлестік директорының орынбасары, «Құрмет» орденінің иегері Сержан Мұсайын фестивальде қарағандылық өнер ұжымдары жоғары деңгейде өнер көрсеткенін айтты.

– Қарағанды концерттік бірлестігінің шығармашылық ұжымдары үшін Корольдік опера театрында өнер көрсетіп, Араб әлемінің қайталанбас мәдениеті мен сұлулығын көзбен көру – зор мүмкіндік болды. Оман жұртшылығы Қарағанды ұжымдарының жоғары кәсіби деңгейін лайықты бағалады. Біздің ұжымдар шақырылған қатысушылардың ішінде алғашқылардың бірі болып сахнаға шықты, – деді Сержан Мұсайын.

Фестивальге Маскат қаласының ресми өкілдері, сондай-ақ, Қазақстан Республикасының Оман Сұлтанатындағы Төтенше және Өкілетті Елшісі Айдарбек Тұматов отбасымен, музыка профессоры Иссам Эльмаллах және басқа да мәртебелі қонақтар қатысты.

Ерік НАРЫН,
«Ortalyq Qazaqstan»