Ел ертеңінің бағдары
Жыл сайынғы Президент Жолдауын асыға күтіп отырамыз. Биылғы Жолдауда жер мен шаруа мәселесі баса айтылып, биік деңгейде сөз болды. Қалың жұртшылықты қатты толғандыратын қадау-қадау мәселелер тағы да күн тәртібіне өткір қойылып отыр.
Жолдауда елдің жағдайы қалай деп елеңдегенде, ең алдымен шалғай аудандарда, шекаралық аудандарда мұғалімдер мен дәрігерлерлердің жетіспеушілігі өте алаңдатарлық ахуал. Кадр тапшылығы, әсіресе, ауылдық жерлерде қатты сезілуде. Кезінде жабылып қалған облыстар, аудандар қайта ашылғанда қатты қуанғанымызды несіне жасырайық. Жол жөнделетін болды, құбыр тартылатын болды, мектеп ашылатын болды, шағын кәсіпкерлік дамитын болды деп қуанды жұртшылық. Не нәрсені болсын бүлдіріп алып, одан соң қалпына келтіру оңай шаруа емес. Мойындау керек, қала мектептерінде бір сыныпта 40 бала отырса, ауыл мектептерінде бір сыныпта 4-ақ оқушы қалған жағдайлар бар. Міне, ауылдық жерлерде мұғалімдердің, дәрігерлердің, мәдениет саласы қызметкерлерінің жетіспеушілігінің бір ұшы осында жатыр. Мұғалімдерге, дәрігерлерге жағдай жасау, алтын бесік ауылға апару үшін билік басындағылар қатты ойлануы керек. Мектеп мұғалімдерінің беделін көтеру олардың материалдық жағдайын жақсартумен байланысты, сонымен бірге қоғамдағы ұстаздың рөліне мектеп те, ата-ана да, билік те бірдей жауапты екенін ұмытпайық.
Сонымен қатар, жер ананы емген ауылдағы ағайын үшін жер мәселесі өзекті. Жер – адамға аманатқа берілген асыл қазына, топырақ – біздің бесігіміз. Ауыл шаруашылығын дамыту, диқанды құрметтеу, «бармақ басты, көз қыстыға» салмай, олардың еңбегін бағалап, марапаттап отыру – бүгінгі күннің өзекті мәселесі. Жер көзжұмбайлыққа көнбейді. Аманат жерден басталып, адамзатпен жалғасатын қасиетті дүние. Біз Президент атап өткендей ауыл шаруашылығына үлес қосып жатқан еңбек адамдарын ардақтай білуіміз керек!
Сәкітай СЫЗДЫҚОВ,
Ақтоғай аудандық ардагерлер кеңесінің төрағасы.
