Екпеден бас тарту қауіпті еселейді
28 қарашадағы жағдай бойынша, өңірде қызылша жұқтырды деген 564 адам бақылауға алынды. Оның 433-і зертхана қорытындысынан кейін нақтыланды.
Облыстың санитариялық-эпидемиологиялық бақылау департаменті басшысының орынбасары Гүлжан Жақтайқызы инфекцияға сезімталдық 14 жасқа дейінгі балалар арасында жиі кездесетінін айтты. Әсіресе, қызылшамен сырқаттану 1-4 жас аралығындағы сондай-ақ, вакцина алмаған балалар арасында тіркелуде. Көбінесе ата-анасының бас тартуына байланысты немесе егу жасына жетпеген, медициналық қарсы көрсетілімдері бар балалар жиі ауыруда.
– Өздеріңіз білетіндей 6 қарашадан бастап эпидемиологиялық жағдай тұрақтанғанға дейін 6 айдан 11 айға дейінгі балаларда қызылшаға қарсы қосымша жаппай иммундау басталды. Бүгін осы жастағы 3 мыңнан астам бала егілді.
2023 жылғы 5 желтоқсаннан 2024 жылғы қаңтарға дейін қызылшаға қарсы егу мәртебесіне қарамастан 2 жастан 4 жасқа дейінгі 11 айлық 29 күндік балаларға қосымша жаппай иммундау жүргізілуде, – деді Гүлжан Жақтайқызы.
Облыстың санитариялық-эпидемиологиялық бақылау департаменті эпидемиологтары қызылшаға және қызамыққа қарсы қосымша иммундауда Үндістан өндірген аралас вакцина қолданылатынын атап өтті. Вакцина әлемнің 70-тен астам елінде қолданылады. Дүниежүзілік денсаулық сақтау ұйымы мақұлдаған, мемлекеттік тіркеуден өткен. Ал, қосымша иммундау балалардың тіркелген жері бойынша емханада тегін жүргізіледі.
Аяулым СОВЕТ,
Ortalyq.kz
