Дәнекерлеушілер дәріптеледі

«Жұмысшы мамандықтарының жылында» Ә.Сағынов атындағы Қарағанды техникалық университетіне Францияның Қазақстандағы елшілігінің өңірлік ынтымақтастық жөніндегі атташесі Ксавье Ле Торривеллек келді. Университет базасындағы Қазақстандық дәнекерлеу институтына ерекше назар аударды.

– Елімізде 1960 жылдары Қарағанды, Алматы, Целиноград (қазіргі Астана), Петропавловск, Павлодар машина жасау зауыттарында доғалы, түйіспелі және электр-қожды дәнекерлеу­дің автоматты тәсілдері кеңінен қолданыла бастады. Қолмен дәнекерлеуді жартылай автоматты дәнекерлеу ығыстырды. Алғашқылардың бірі болып Қарағанды техникалық университеті «Дәнекерлеу өндірісінің жабдықтары және технологиясы» мамандығы бойынша инженерлерді дайындай бастады, – деп атап өтті университет ректоры Сәуле Сағынтаева.

Франция елінен келген өкілдің назарын көрмедегі дәнекерлеу ісінің тарихына аударды. Тәжірибелі профессор-оқытушылар құрамын таныстырып, әлемдік және республикалық рейтингтердегі көрсеткіштерін жылдан-жылға жақсартып келе жатқан университеттің жетістіктерін айтты. Дәнекерлеу институтына тоқталып, жобаны жүзеге асыруға «TOTAL E&P Kazakhstan» француз компаниясы бастамашы болғанын тағы бір атап өтті.

– Университет базасындағы Қазақстанның дәнекерлеу институты өндіріс мамандарын даярлау жөніндегі заманауи техникалық кешенге айналды. Жалпы отандық дәнекерлеу өндірісі 2014 жылдан халықаралық деңгейдегі екінші топтағы мамандар дайындауды бастады. Жобада мұнай-газ өндірісін дәнекерлеу­дің заманауи технологиясына көшіру көзделген. Оқуға бірінші кезекте дәнекерлеу өндірісінде тәжірибесі бар, орташа және орташа-мамандандырылған тыңдау­шылар қабылданады. Екінші категория әр бағыттағы жоғары техникалық білімі бар тыңдау­шыларға бағытталған. Бірінші категория мамандары оқуды аяқтаған соң «Халықаралық дәнекерлеуші» дипломын, екінші категория «Дәнекерлеу бойынша Халықаралық инженер» дипломын алады. Дипломның екі түрі де Халықаралық Дәнекерлеу институтының мүшелерімен (55 мемлекет) мақұлданады. Бұл орталық бітірушілеріне елімізде және одан тыс шетел компаниясында жұмыс істеуге мүмкіндік береді. Шығындар, сонымен қатар, оқу мерзімі кезіндегі стипендия жер қойнауын пайдаланушы қаражаты есебінен төленеді.
Кешен 700 шаршы метр ауданы бар бөлек тұратын ғимаратта орналасып, АҚШ, Швеция, Финляндия және Италия өндірген заманауи дәнекерлеу құралдарымен жабдықталған. Қажетті мультимедиялық жабдықтар мен оқу-әдістемелік материалдар бар. Институт штаты дәнекерлеу өндірісі саласында ғылыми-зерттеуге ықпал етер практикалық жұмыстарда үлкен тәжірибесі бар жоғары білікті мамандардан тұрады, – деп атап өтті Сәуле Сағынтаева.

Кездесуде Ксавье Ле Торривеллек маман даярлау және халықаралық ынтымақтастықты дамыту бойынша университеттің жүргізіп отырған жұмысына оң баға берді. Осы орайда франция университеттерімен серіктестік орнату арқылы қазақстандық оқу орындарына жан-жақты қолдау көрсетуге ықылас танытты.

– Қазіргі таңда жұмысшы мамандықтары дәріптеліп, техникалық және технологиялық бағыттағы білімге сұраныс артты. Жастар тәжірибесі кәсіби шеберлікті арттырып, маман ретінде қалыптасуға үлкен септігін тигізуде. Мысалы, дәнекерлеу ісі – тек ауыр еңбек қана емес, сонымен қатар, шыдамдылық пен дәлдікті қажет етеді. Бүгінде жұмыс беруші үшін өз адамдарын шетелге тәжірибеден өткізуге жіберу тегін. Стипендиаттар үшін де солай. Егер бұрын тәжірибеден өтетін үміткерлерге шет тілін білу керек болса, бүгінде ол міндетті емес.
Университет студенттерінің тәжірибе алмасуы әрі француз профессорларының дәрістер өткізетін уақытша сапарларына келетін болсақ, Франция елшілігі қажетті шығындарды өз мойнына алуға дайын. Қазақстаннан келген магистранттар мен докторанттар үшін тиімді стипендия­лар қарастырылған, – деп атап өтті Ксавье Ле Торривеллек.

Франция елінің мамандары Қазақстанның дәнекерлеу институтының материалдық базасын және курстарды әдістемелермен қамтамасыз етудің сапасын жоғары бағалады.

Аяулым СОВЕТ,
«Ortalyq Qazaqstan»
Суреттер университет архивінен