Боз кілемде – болашақ чемпиондар

Теміртауда Қазақстанның еңбек сіңірген жаттықтырушысы Амантай Айдархановты еске алуға арналған дзюдодан дәстүрлі «Jenys Cup – Магнитка шамдары» халықаралық турнирі аяқталды. Төрт күнге созылған байрақты бәсекеге тек еліміздің әр өңірінен ғана емес, көршілес Ресей, Өзбекстан және Қырғызстан елінен де жас шеберлер өнерін ортаға салды. Жалпы, байрақты бәсекеде 2009-2010 жылы туған 400-ге жуық спортшы бақ сынасты. Турнирдің ашылу салтанатына облыстық дене шынықтыру және спорт басқармасының басшысы Серік Сәпиев пен облыстық мәслихат депутаты, Ә.Молдағұлова атындағы облыстық мамандандырылған мектеп-интернат-колледжінің директоры Ерден Халилин арнайы қатысты. Сонымен қатар, «Qarmet» АҚ директорлар кеңесінің төрағасы Вадим Басин мен қалалық мәслихат депутаты Алексей Ломакин қатысып, жарысқа қатысушыларға жылы лебізін білдірді.

Басқарма басшысы турнирге қатысушыларға сәттілік тілеп, маңыздылығын атап өтті. Айта кетейік, турнирдің жоғары деңгейде өтуіне жыл сайын «Qarmet» АҚ демеушілік жасап келеді. Компания
көптеген жылдар бойы бұл дәстүрлі доданы қолдап, жас спортшылардың шеберлігін шыңдауға және өңірдегі дзюдоның дамуына зор үлес қосуда.

– Сонау жылдардан бері өткізіліп келе жатқан турнир өзінің дәстүрінен жаңылған емес. Жыл сайын үздіктерді бір алаңға тоғыстырып, жас спортшылардың шеберлігін шыңдауда. Болашақ әлем чемпиондары дәл біздің қалада, біздің спорт залымызда белдесіп жатыр. Бүгінде кіл мықтыларды жыл сайын жи- нау да біздің дәстүрімізге айналған. Дзюдо – ең негізгі спорт түрлерінің бірі. Осы спортпен айналысып жүрген әрқайсыңыз мықтысыздар. Келер жылы да дәстүрлі турнирге келіп, жас спортшылардың
өнерін тамашалаймыз деген ойдамын. Біз әрқашан спортшыларға толық қолдау көрсетеміз, – деді Вадим Борисович.

Сонымен қатар, Алексей Ломакин де сөз алып, турнирге арнайы шақыртылған қонақтарға сый-сияпат тарту етті. Жарыс ұлдар мен қыздар арасында тоғыз салмақ дәрежесі бойынша өткізілді. Белдесулер бір мезгілде үш татамиде ұйымдастырылған. Әр спортшы барын салып, командасына жүлде алып келу үшін соңына дейін күресті. Медаль саны бойынша көп нәтиже көрсеткен командалар ақтық кезеңге, яғни, жалпы командалық сайысқа жолдама алды. Бұл кезеңде алты команда ғана өтуі шарт. Кейін сол алты команда жеребе арқылы қарсыластары анықталып, бір-бірімен командалық түрде сайысты. Бұл кезеңде әр команда алты үздік палуанын ортаға шығарып, өзара белдесті. Егер бір команданың төрт балуаны қатарынан жеңіске жетсе, жеңіс автоматты түрде сол командаға беріледі. Сәйкесінше, жеңгені – финалға өтеді.
Аталған турнирге Қарағанды облысының атынан үш команда шығыпты. Екеуі Қарағандылық клуб болса, үшіншісі Теміртаудан қатысқан. Теміртаудың өзінен 20-дан астам спортшы бақ сынапты. Нәтижесінде, олардың екеуі – алтын, екеуі – күміс жүлде еншілесе, төртеуі – қола жүлдеге қол жеткізді. Атап айтсақ, команда мүшесі Асқар Әділбеков 60 келіге дейінгі салмақ дәрежесінде белдесіп, І орынға ие болды. Сонымен қатар, «Көркем техникасы үшін» аталымын да жеңіп алған. Осылайша, қалалық дзюдо академиясының бапкері Рустам Бөрібаевтың шәкірттері жекелей сында тамаша өнер көрсетіп, ақтық кезеңге, яғни командалық сынға жолдама алыпты.
Қарағандылық «Жас сұңқар» дзюдо мектебінің тәрбиеленушісі Мәриям Хамзенова 63 келі салмақ дәрежесінде белдескен. Нәтижесінде, алтыннан алқа тағып, командасына жалғыз алтынды сыйға тартты. Бұдан бөлек, аталған дзюдо мектебінің жас спортшылары екі күміс және бір қола жүлдеге қол жеткізіпті. Командалық кезеңге жолдама еншілеген «Жас сұңқар» Қостанай облысының командасымен кездесіп, жеңіске жеткен.

– Биыл біз жеңіске бір табан жетпей қалдық. Келер жылға жоғарғы дайындықпен келіп, турнир жеңімпаздары болуымыз керек. Біздің мақсат – сол. Командалық сында қостанайлықтармен бақ сынадық. Басында команда мүшелері жеңіліп жатты. Артынша төрт спортшымыз жеңіске жетіп, кездесуді мерзімінен бұрын аяқтадық. Өз басым дзюдомен алты жасымнан бастап шұғылданамын. Самбо спортымен де айналысамын. Самбодан ел чемпионымын. Ал, дзю- додан ел чемпионатының жүлдегері атанғанмын. Осы жолы бар күшімді салып, жекелей сында төрт қарсыласымды жеңдім. Нәтижесінде, чемпион атандым. Одан кейін бапкерім мені командалық бәсекеге қосты. Бұл жерде тек өзің үшін ғана емес, команданың абыройы үшін белдесуің қажет. Шегінуге жол жоқ. Осылайша бар күш жігерімді салып, командама да жеңіс сыйладым, – деді Мәриям Хамзенова.

Турнир қорытындысы бойынша жалпыкомандалық есепте елорда- лықтар топ жарды. Одан кейінгі сатыға Павлодар палуандары табан тіресе, Қарағандылық «Жас сұңқар» мен Теміртау дзюдошылар өзара үштікті бөлісті. Сонымен қатар, бірнеше аталым бойынша үздік деп танылған жас дзюдошылар ұйымдастырушылар тарапынан ақшалай сыйлыққа ие болды.

Ербол ЕРБОЛАТ
«Ortalyq Qazaqstan

ТЕМІРТАУ