Болашақтың кепілі

Жаңа Конституция жобасының жариялануы – ел болашағына қатысты маңызды әрі тарихи қадам. Бұл тек заңдық мәтін емес, біздің азаматтық санамызды, жауапкершілігімізді және мемлекеттің бағытын айқындайтын құжат. Біздің бұдан түйгеніміз, мемлекет өз азаматтарын басты құндылық ретінде қабылдаған, ал әрбір бап қоғамдағы әділет, теңдік пен ашықтықты нығайтуға бағытталған.

Бұл жобада адамның құқықтары мен бостандықтары басты орынға қойылғанымен, тек құқыққа бағынуды емес, жауапкершілікті сезінуді де нақты көрсетеді. Әлеуметтік кепілдіктер, білім мен денсаулық сақтау, жастардың құқықтарын қорғау – өмірімізде нақты өзгеріс әкелетін бағыттар. Дін мен мемлекет арасындағы ара-жіктің айқындалуы, құқық теңдігі мен сенім еркіндігінің қорғалуы – біздің құқықтық мәдениетіміз бен азаматтық сеніміміздің іргетасы.
Бір түсінгеніміз, қоғамдағы шешімдерге өз пікірімізді білдіргенде ғана біз өз құқықтарымыз бен мүмкіндіктерімізді толық сезінеміз. Сол арқылы біз мемлекетіміздің дамуына үлес қосатын саналы және белсенді азаматқа айналамыз.
Жаңа Конституцияның маңызды ерекшелігі – экономикалық және әлеуметтік даму мақсаттарын заң деңгейінде бекітуінде. Бұл – тек құқықтық қағидат емес, елдің тұрақты өсуі мен азаматтардың әл-ауқатын арттыруға бағытталған нақты бағдар. Әрбір бап біздің өмірімізге әсер ететін іс-әрекеттер мен шешімдерді айқындайды, сондықтан әр азаматтың пікірі маңызды.
Сонымен қатар, Конституция жобасы қоғамдық сенім мен келісімге бағытталған. Ашықтық, есептілік, билік пен азамат арасындағы диалог – осының бәрі жаңа құрылымның негізі. Құжаттың айқын, түсінікті тілі әрбір азаматқа өз құқықтары мен міндеттерін түсінуге мүмкіндік береді. Бұл – құқықтық мемлекетке апаратын нақты қадам, әрі азаматтық мәдениеттің қалыптасуына серпін береді.
Жалпы, жаңа Конституция жобасы елді әділетті, заманауи және азаматқа бағдарланған мемлекетке айналдыруға бағытталған бағдаршам іспетті. Ол тек биліктің құжаты емес, біздің әрқайсымыздың өмірімізді, таңдауымызды және болашағымызды айқындайтын негізгі құрал ретінде құнды. Сондықтан әр дауыс, әр пікір маңызды – бұл құжат болашағымызға сеніммен қарауға мүмкіндік береді.

Қасымхан БҮРКІТҰЛЫ
“Ortalyq Qazaqstan”