Биыл Молодежный кентінде жаңа қазандық іске қосылады
Осакаров ауданының Молодежный кентінде жаңа қазандықтың құрылысы қарқынды жүріп жатыр. Жаңа нысан тұрғындарды сапалы жылумен қамтамасыз етуге мүмкіндік береді.
Құрылыс барысын Осакаров ауданына жұмыс сапары барысында Қарағанды облысының әкімі Ермағанбет Бөлекпаев бақылап қайтты.
Өңір басшысына жоспарланған жұмыс кестеге сәйкес жүріп жатқаны, жұмысшы күш жеткілікті, материалдар мен жабдықтардың жеткізілуне қатысты еш кедергі жоқ екендігі баяндалды. Қуаттылығы 15 МВт жаңа блок-модульдік қазандықты мердігер жылыту маусымының басында тапсыруды жоспарлап отыр.
Оскакаров ауданында медициналық қызметтер де жетілдіріліп жатыр. Алғашқы медициналық-санитарлық көмектің үздік тәжірибе орталықтары ашылады. Онда пациенттерге кешенді медициналық, әлеуметтік және психологиялық көмек көрсетіледі. Патронаждық қолдау көрсетіле бастайды.
Өңір басшысына алдағы реформалар жайлы Есіл ауылының дәрігерлік амбулаториясында баяндалды. Қазір мұнда 1400 адам тіркелген. Кадр тапшылығы жоқ. Барлық қажетті жабдықтар, соның ішінде шұғыл көмек көрсету үшін де қажетті құрылғылар бар. Мобильді медициналық кешеннің арқасында тұрғындарға скринингтік тексерулер қол жетімдірек бола түсті.
Сондай-ақ, облыс әкімі Есіл ауылында екі оқу орнының жұмысымен танысты.
Осакаров ауданының мектеп-интернат-колледжінде студенттерге бірнеше мамандықтар бойынша сабақ беріледі: автомобиль жөндеуші слесарь және электрик, аспаз және кондитер. Алдағы уақытта ауылда сұранысқа ие жаңа мамандықтар ашу көзделіп отыр. Механизаторлар, дәнекерлеушілер, тігіншілер және бухгалтерлер дайындалады.
№2 жалпы білім беретін мектепте күрделі жөндеу қажет. Ғимарат 1975 жылы салынған. 220-дан астам бала оқиды. Жергілікті ауыл шаруашылығы тауарын өндірушілер есебінен ЖСҚ әзірленді. Жөндеу келесі жылы басталады деп жоспарланған. Ермағанбет Бөлекпаев аудан билігіне бұл мәселенің шешілуін кешіктірмеуді тапсырды.
Материалды әзірлеген Аида РАХЫМҚҰЛОВА
