Халықаралық әйелдер күні қарсаңында аймақ басшысының орынбасары – өңірлік Қазақстан халқы Ассамблеясы төрағасының орынбасары Әлібек Әлденей бейбітшілік пен келісімді нығайтуға үлес қосқан бірқатар нәзік жандылармен кездесті.
Ассамблеяның 30 жылдығына арналған шараға ардагерлер, облыстық Қазақстан халқы Ассамблеясы және оның құрылымдарының мүшелері, этномәдени бірлестіктердің өкілдері, жоғары оқу орындарындағы Қазақстан халқы Ассамблеясы кафедраларының меңгерушілері, журналистер, мәдениет қайраткерлері, медиаторлар және өндірістік кәсіпорындардың қызметкерлері қатысты.
Әйелдерді мерекемен құттықтаған Әлібек Әлденей олардың 30 жыл ішінде қоғамдағы бейбітшілік пен бірлікті нығайтатын негізгі институтқа айналған Ассамблеяның мақсаттары мен міндеттерін іске асырудағы маңызды рөлін атап өтті.
– Сіздер ерлермен қатар ел игілігі үшін жұмыс істеп, қоғамдық жұмыстардан қалыс қалмайсыздар. Бейбітшілік пен келісімді нығайтудағы да үлестеріңіз зор. Араларыңызда Қазақстан халқы Ассамблеясының қалыптасу тарихында өшпес із қалдырғандар аз емес, – деді Әлібек Әлденей.
Жиналғандар өз кезегінде жылы лебіздер мен құттықтаулар үшін алғыс айтып, атқарып жатқан жұмыстарымен бөлісті. Мәселен, облыстық Қазақстан халқы Ассамблеясы Аналар кеңесінің мүшесі, көпбалалы ана Раиса Исраилова өскелең ұрпақты қазақстандық патриотизм рухында тәрбиелеу құпияларымен бөлісті.
– Менің бес балам бар. Бәрі қазақ тілін біледі және мемлекеттік тіл байқауларында талай рет жүлделі орындарға ие болды, – деді Раиса Исраилова.
Ал, Ә.Сағынов атындағы Қарағанды техникалық университетінің Қазақстан халқы Ассамблеясы және әлеуметтік-гуманитарлық пәндер кафедрасының меңгерушісі Динара Шорманбаева болса, өңірдегі Қазақстан халқы Ассамблеясы ғылыми-сараптамалық тобының қызметі туралы айтты.
Кездесуде «Абай жылу жүйелері» ЖШС сорғы қондырғыларының машинисі Наталья Ни де болды. Ол Қазақстан халқы Ассамблеясының 30 жылдығы «Жұмысшы мамандықтары жылы» деп жариялануымен тұспа-тұс келгеніне тоқталды.
– Бұл еңбек адамына қоғамдағы еңбексүйгіштік, кәсіпқойлық идеяларын және «Адал азамат – Адал еңбек – Адал табыс» қағидатын ілгерілетуде зор жауапкершілік жүктейді, – деді Наталья Ни.
Жаңа қазақстандық қоғамды қалыптастыру ісіндегі табысты жұмысы және өңірдің қоғамдық-саяси өміріне белсенді қатысқаны үшін кездесудің бірқатар қатысушыларына облыс әкімінің атынан Алғыс хаттар табыс етілді.
Салтанат ІЛИЯШ,
«Ortalyq Qazaqstan»
Сурет ұйымдастырушылардан
