Бес адамның өмірін жалмаған жол апаты орын алды

Маусымның сегізінен тоғызына қараған түні Дубовка кентінің маңындағы Қызылорда-Павлодар автожолының 931-ші шақырымында үш көлік соқтығысып, салдарынан бес адам қаза тапты. Тағы үшеуі ауруханаға жеткізілді.

Облыстық полиция департаментінің мәліметтеріне сүйенсек, оқиға сағат 22:23-те орын алған. Бұрылыста Audi, Chevrolet Cobalt және Toyota Previa соқтығысқан. Chevrolet Сobalt көлігінің 22 жастағы жүргізушісі мен төрт жолаушысы алған жарақаттарынан көз жұмды. Ал, Audi көлігінің 21 жастағы жүргізушісі және 17 жастағы жолаушысы мен Toyota Previa көлігінің 39 жастағы жолаушысы медициналық мекемеге жеткізілді.

Қазіргі уақытта қылмыстық іс қозғалып, тиісті сараптамалар тағайындалған.

Ауруханаға жеткізілген науқастардың жағдайы туралы облыстық денсаулық сақтау басқармасының баспасөз қызметі түсініктеме берді. Дәрігерлердің сөзіне сүйенсек, екеуінің жағдайы – ауыр. Ал, қалғандары амбулаториялық емделуге жіберілген.

Ербол ЕРБОЛАТ,
Сурет пен видео облыстық ТЖД-нен
Ortalyq.kz