Берік Уәли ҰҚШҰ елдерінің әскері бір аптаның айналысында қайтатынын айтты
Ұжымдық қауіпсіздік туралы шарт ұйымының әскері бір аптаның айналысында елден қайтады. Бұл туралы ҚР Президентінің баспасөз хатшысы Берік Уәли «Хабар 24» телеарнасына берген сұхбатында айтты, деп хабарлайды ҚазАқпарат тілшісі.
«Ұжымдық қауіпсіздік туралы шарт ұйымынан кірген күштің негізгі миссиясы – елімізде стратегиялық нысандарды күзету. Тағы қайталап айтамын, стратегиялық нысандарды Ұжымдық қауіпсіздік туралы шарт ұйымының әскері қорғағандықтан, біздің қарулы күштеріміздің, Ұлттық ұланның әскерлері террористер көп шоғырланған Алматы қаласы, Алматы облысы және басқа да өңірлерде солардың көзін жоюға еркін мүмкіндік алды. Яғни, біздің стратегиялық нысандарды Ұжымдық қауіпсіздік туралы шарт ұйымының әскері қорғайды да, өзіміздің әскерилер барлық террористердің көзін жоюға әрекеттенді. Бұл бізге үлкен көмек болды», – деген Мемлекет басшысының баспасөз хатшысы жалпы жағдай тұрақталған соң, ҰҚШҰ елдері әскерлерінің миссиясы аяқталатынын атады.
«Олардың ешқайсысы қалмайды. Бірден өз елдеріне кетеді. Ұжымдық қауіпсіздік туралы шарт ұйымы деген жалғыз Ресей ғана емес, өздеріңіз білесіздер. Биыл төрағалық етіп отырған Армения бар, Беларусь, Тәжікстан бар. Бұл әскердің бәрі көп тұрақтамайды. Ары кетсе бір апта көлемінде кетеді. Мүмкін, оған да жетпейді. Бәрі қайтарылады. Оның үстіне қазір біліп отырсыздар, жағдай тұрақталып келе жатыр», – деді Берік Уәли.
