Басылымға белсенді жазылдық
Облысымыздың рухани айнасына, оқырмандарының сүйікті басылымына айналған «Орталық Қазақстан» газетін үзбей оқимын. Еліміздегі өзіндік өрелі тарихы бар, бағыт-бағдары айқын, қалың оқырманы қалыптасқан беделді басылымға биыл QR код қосымшасы арқылы жазылуға мүмкіндік туды. Жылдағы дәстүрден жаңылмай биыл да арнайы жазылып, оқуды жалғастырамын.
Басылым талай тарихи оқиғалардың куәсі болды. Әр уақытта ұлттық жігерімізді жанып, мәдениетіміз бен өнерімізді, салт-дәстүрімізді, қасиетті ана тілімізді дәріптеуде қажымай-талмай қызмет етті. Жұртшылықтың жүрегіне білімге құмарлық, өмірге құштарлық, Отанды сүю тәрізді абзал қасиеттерді сіңіре білді.
Бүгінгі таңда басылым жастардың бойында патриоттық сезімнің қалыптасуына айтарлықтай үлес қосып келеді. Газет беттерінде Әбілқас Сағынов атындағы Қарағанды техникалық университетінің тыныс-тіршілігі туралы талай тартымды мақалалар жарық көрді. Облыс көлемінде аталып өтетін дәстүрлі мәдени шаралар да басылым назарынан тыс қалып көрген емес.
«Орталық Қазақстан» газетінің таралу ауқымы жыл санап ұлғайып, қанатын кеңге жайсын. Журналистердің шығармашылық жаңа табыстарға жете беруіне тілектестігімізді білдіреміз.
Сәуле САҒЫНТАЕВА,
Ә.Сағынов атындағы Қарағанды техникалық университетінің ректоры.
