Балқашты жырға бөледі
Адамға ақын, жазушы, қаламгер болу емес, азамат болу – парыз. Себебі, Ұлы Абай атамыз айтқандай оқып, көңілге тоқып, ізденіп, еңбектеніп, халыққа қызмет еткен адам ғана бейнеттің зейнетін көреді. Мұны ғұмырлық ұстанымына айналдырып, сөз өнерінде қанатын кеңге жайып жүрген тума таланттар аз емес. Олардың қатарында Қазақстан Жазушылар одағының және Қазақстан Журналистер одағының мүшесі, ақын-жазушы, шашубайтанушы, руханият жоқшысы, Қазақстанның Құрметті журналисі Жанболат Башарұлы да бар. 75 жастың төріне шыққан қаламгер Балқаш қаласындағы Мағауия Хамзин атындағы мәдениет сарайында «Ар мен Зар» атты кітабының тұсауын кесіп, «Қуат беріп бойыма ғұмыр әні…» атты шығармашылық кешін өткізді. Шарада ақынның 20-ға жуық өлеңі оқылып, оның сөзіне жазылған әндер шырқалды.
Шараның шымылдығын кеш иесінің өзі ашты. Бұдан кейін сахнаға озған Балқаш қаласының әкімі Сапар Сатаев қалам ұстап, ой кешкен мерейтой иесін құттықтап, иығына шапан жапты. «Жақсыға құрмет – жаранға міндет» дейді қазақ даналығы. Өз өңірінің қандай да бір саланың дамуына сүбелі үлес қосқан қатардағы жандар үшін салмақты марапат бар, ол – «Құрметті азамат» атағы. Бұл атақ осы жолы иесін тапқандай. Мәслихат депутаты Серікбол Түсіпбеков «Балқаш қаласының Құрметті азаматы атағы Жанболат Башарұлына беріледі» дегенде көрерменнің ықыласы мен қошеметтен құлақ тұнды.
– Балқаш – экономикасымен, басқа салаларымен ғана емес, мәдениетімен, өнерімен де көшбасшылық маңызға ие шаһар. Басқасын былай қойғанда, айтыстың атасы болып саналатын Шашубай ақынның осы Балқаш төрінде, сауық құрып, қазақтың қанына біткен жыраулық, әншілік өнердің алтын бесігі, алтын ұясы қалыптасқан жер. Сондықтан да, қазақ өнері мен мәдениетінде маңызы ерекше Балқашта Жанболат Башар ағамызға Құрметті азамат атағы берілуі – заңдылық, – деді Балқаш қаласының әкімі Сапар Сатаев.
Осылайша, туған елінің алғаусыз махаббатына бөленген жазушының көңілі уақыт өлшеміне сыймайтын кеңістіктің төрінде шалқыды. Сонымен қатар, шаһар басшысы кеш қонағы биылғы жылы 75 жасқа толған Қазақстан Жазушылар одағының мүшесі Ақтоғай ауданының Құрметті азаматы, Халықаралық «Алаш» әдеби сыйлығының иегері, ақын Абзал Бөкенге, сондай-ақ Қазақстан Республикасының еңбек сіңірген қайраткері, композитор және профессор, Балқаш қаласының Құрметті азаматы Тілеуғали Қышқашбаевқа құрмет көрсетіп, сый-сияпат жасады.
– Жанболат құрдасым – жазу үстеліне отырған сәттен әдебиетке қызмет етуге бел буған жан. Шығарманың шынайы өмірде қайталануы, кейіпкерлер көпшілік оқырманның таңқалысын тудырды. Сайып келгенде қаламгердің мақсаты бұлыңғыр әлемнің бүкпесіз шындығын бұрмаламай, қисынын тауып қиыстырып жеткізу емес пе? Осы үдеден шықан Жанболат Башарұлының әр шығармасы мен үшін биік және жүрегімнің төрінен орын алған, – деді ақын Абзал Бөкен.
Бұдан кейін «Ар мен Зар» кітабының тұсауы кесіліп, оқырманға ұсынылды. Кешке өнер иесін құттықтап, алыс-жақыннан ақындар мен журналистер келді. Атап айтқанда, ақындар Мүсіркеп Сейдахмет, Қуандық Сәденов, Ілияс Мұқай, «Арқа ақшамы» газетінің бас редакторы, сатирик Әдебиет Белгібайұлы, «Балқаш өңірі» газетінің бас редакторы ақын Қуаныш Аманқұлов, Балқаш қалалық Ардагерлер кеңесінің төрағы Тайтөлеу Жұманов жылы лебізі мен ізгі тілектерін білдірді.
Ақынның өлеңдерін Меруерт Өтенова, Жандос Түсенов, Дина Бөкен, Нұрсұлтан Әділетұлы, Аружан Марат жатқа оқып, көрерменді тәнті етті. Өнер саңлақтарының бірегейі Шашубай Қошқарбайұлын Жанболат Башарұлы зерттеп, қаламына арқау қылғаны айтылып, бір өзі – бір театр болған Шашубайдың «Ақ қайың» әнін дәстүрлі әнші, бірнеше республикалық, облыстық, аймақтық ән байқауының жеңімпазы Аққыз Құнарбекова шырқады. Сонымен қатар, «Мағауия мақамы» деген естеліктер жинағын құрастырып шығарғандығын жеткізген Қазақстан Күйшілер одағының мүшесі, күйші, Мағауия Хамзинның шәкірті Жақсылық Нәдірбеков Әшімтайдың «Қоңыр қаз» күйін шертті. Сондай-ақ, ақынның сөзіне жазылған әндерді әншілер Таңат Іргебаев, Еркеназ Бақтораз, Аманжол Шәймерден шырқады. Сонымен қоса, Қарағанды қаласынан келген әншілер Нияз Тәуекелұлы мен Алмас Серікұлы әннен шашу шашты. Осылайша Көкше көлдің жағасы ән мен жырға бөленді. Көрерменнің ілтипаты мен қошеметі зор болды.
Өз кезегінде жазушы Жанболат Башарұлы «Ар мен Зар» атты кітаптың шығуына қолдау білдірген Балқаш қаласының әкімі Сапар Қайыркенұлына демеушілік жасаған жеке кәсіпкер Марат Алтайұлына алғыс білдірді.
Нұрдос КӘРІМ,
БАЛҚАШ
Ortalyq.kz
