Бағыты айқын бағдарлама
«Ауыл – ел бесігі» – республикалық бюджеттен қаржыландырылатын ауқымды жоба. Елдің бәрі қалаға ағылған тұста аталған ауыл тұрғындарының өмір сүру сапасы мен әл-ауқатын жақсарту, ауылдарды тұрақты дамытуды көздейтін бастаманың маңызы артып отыр. Жоба аясында облысымызда бірқатар жұмыс атқарылған.
Ресми дерекке сүйенсек, «Ауыл – ел бесігі» жобасы бойынша 2019 жылдан бері облыс аумағында шамамен 30 млрд теңге сомасына 214 жоба іске асырылған.
Нақтырақ айтсақ, 91 ауылдың инфрақұрылымы жаңғыртылып, заманға сай түлеген.
Ал, «Дипломмен ауылға» жобасы бойынша алты жыл ішінде 1150 маманға бюджеттік несие және 5,6 млрд теңгеден астам сомаға 2 219 көтерме жәрдемақы төленген.
Алдағы уақытта да бұл бағытта ауқымды жұмыс күтіп тұр. «Ауыл – ел бесігі» жобасы бойынша биыл облыстың барлық жеті ауданының 24 елдімекенінде ішкі кенттік жолдар ретке келтірілмек.
Биыл «Сәкен Сейфуллин-Өспен-Ақадыр» автожолының 26 шақырымы және «Ақсу-Аюлы-Ақтоғай» автожолының 57 шақырымы орташа жөнделген.
Ал, «Қарқаралы-Қоянды» автожолының 29 шақырымын орташа жөндеу аяқталыпты. Жаңа жобалар бойынша Дубовка ауылынан Саран қаласына дейінгі облыстық маңызы бар автожолдың 0-6 шақырымын және «Шахан-Жаңаталап» автожолының 12-17 шақырымын реконструкциялаудың жобалық құжаттамасы әзірленді. Жобаларды жүзеге асыру биылға жоспарланып отыр.
Ауылдардағы тұрмыс-тіршілікті жақсартуға бағытталған «Ауыл – ел бесігі» арнайы жобасы шалғай ауылдарды да аудан стандартына сай әрі модернизацияға лайық етіп, жаңа бір деңгейге көтеру мақсатын көздейді. Жоба шеңберінде жастар жұмыла жұмыс істеп, ауылдарды әлеуметтік- экономикалық тұрғыда дамытуға ат салысады. Бұл бағыттағы жұмыстарды жүзеге асыруда кәсіпкерлердің де үлесі зор.
Мәселен, ауылдағы әлеуметтік инфрақұрылымды дамыту, әлеуметтік аймақтарға білімді мамандар жіберу, ауылдағы жас кәсіпкерлерді қолдау сынды міндеттер ауыл десе, бүйрегі бұрып тұратын әр азаматты бей-жай қалдырмайды.
Аталған мемлекеттік бағдарлама аясында 2020-2025 жылдары аймақтарды дамытуға бағытталғанын атап өту керек. Бағдарламада ауыл тұрғындарының жағдайын жақсарта отырып, ауылдарды көркейту үшін бірнеше бағыт қарастырылған.
Олар – функционалды қалаларды модернизациялау, шағын және ірі қалаларды дамыту, ауылдық елдімекендерді дамыту, оның ішінде, орталық ауылдардың инфрақұрылымын, тұрмыс деңгейін жақсарту.
Ауылды гүлдендіруге атсалысқысы келетін азаматтарға несие алу жағдайы да жеңілдетілгенін атап өткен жөн.
Жәлел ШАЛҚАР,
«Ortalyq Qazaqstan»
