Бүгін – Халықаралық отбасы күні

Бүгін – халықаралық отбасы күні. Бұл мереке 1993 жылы Біріккен ұлттар ұйымының бас ассамблеясымен бекітілген еді. Айтулы күнді біздің елде де ерекше атап өту дәстүрге айналып келеді. Расында, отбасы – ынтымақ пен бірліктің ордасы. Десекте, отбасы мүшелерінің көзқарасы түрленді, құндылықтар өзгерді.

Бұл күнді мерекелеу отбасылық құндылықтарды нығайтуға негізделген. Қоғамда отбасы – әрқашан рухани және мәдени дәстүрлердің сақтаушысы, жанұя жылулығын сөндірмей, керегесін кең ұстап, тарих толқынымен келе жатқан киелі бақ мекен. Мереке күні әр шаңырақ шаттыққа, бақыт пен сәби күлкісіне толы болсын! Әр әулеттің мерейі үстем болып, тамыры тереңге жайыла берсін деп тілек білдіреміз!

Отбасы – сүйіспеншіліктің, құрмет пен ынтымақтастықтың ошағы, яғни кез келген зиялы қоғамның діңгегі. Отбасының аман-саулығы әрбір елдің дамуы мен келешегінің өлшемі деп білеміз. Сондықтан да бүгінгі мерекеде бір-біріңізге әдемі де әсерлі сөздер арнап, ерекше сыйластық көрсете біліңіздер! Тек қана бүгін емес, жылдың әрбір минутында, әрбір сағатында, жанұяңызды ыстық ықыласыңыз бен шексіз махаббатыңызға бөлей жүріңіз!

Материалды әзірлеген Аида РАХЫМҚҰЛОВА