БҰҰ Қазақстандағы конституциялық реформаларды жоғары бағалайды
Қазақстан Республикасы Конституциясының 30 жылдығына арналған «Конституция және мемлекеттілік: құқық пен болашақ диалогы» атты ғылыми-тәжірибелік конференцияда Қазақстандағы БҰҰ-ның тұрақты үйлестірушісі Саранго Раднаарагча пікір білдірді. Конференция барысында Сарангоо Раднаарагча Қазақстанда жүргізіліп жатқан реформаларды қолдайтынын ерекше атап өтті.
– Қазақстан Президентінің бастамалары – «Заң және тәртіп», «Еститін мемлекет» тұжырымдамалары және оларға байланысты Қазақстан Конституциясына енгізілген соңғы түзетулер, оның ішінде Конституциялық Соттың құрылуы мен Адам құқықтары жөніндегі уәкілдің мәртебесін күшейту – мұның бәрі ашықтыққа, азаматтардың қатысуына және негізгі бостандықтарды қорғауға берілген берік ұстанымды көрсетеді.
Сондықтан БҰҰ Қазақстанда демократия мен адам құқықтарын кеңейту мен нығайтуға бағытталған конституциялық реформаны құптайды, – деді ол.
Бұл бастамалар Қазақстанның өңірлік қана емес, жаһандық деңгейдегі жауапты әріптес ретіндегі беделін айқындайтынын баса айтты.
– Қазақстан – ядролық қаруды таратпау, алғашқы медициналық көмекті дамыту және басқа да салалардағы көшбасшы. Ол сондай-ақ, БҰҰ-ның адам құқықтары жөніндегі тетіктеріне белсенді қатысушы болып табылады. Негізгі шарттарды ратификациялау арқылы Қазақстан халықаралық қауымдастықтың жауапты әрі көреген мүшесі болуға дайын екендігін көрсетеді. Осы тұрғыда Орталық Азия мен Ауғанстан үшін БҰҰ-ның Тұрақты даиу мақсаты жөніндегі Өңірлік орталығын құру бастамасын атап өткен жөн. Аталған орталықты Алматы қаласында орналастыру туралы келісім биылғы жылдың 3 тамызында қол қойылды, – деп қосты ол.
Аида РАХЫМҚҰЛОВА
