Аймақ басшысы Ермағанбет Бөлекпаев жұмыс сапарымен Приозерск қаласында болды. Сапар аясында өңір басшысы қаланың негізгі әлеуметтік және инженерлік нысандарын аралап, жергілікті тұрғындармен ашық форматта кездесу өткізді. Кездесу барысында қаланың инфрақұрылымдық, әлеуметтік, денсаулық сақтау, білім беру және туризм салаларындағы өзекті мәселелер көтеріліп, нақты ұсыныстар мен шешу жолдары қарастырылды.
Кездесу барысында облыс әкімі Ермағанбет Бөлекпаев Приозерск өңірінің туризм саласындағы әлеуетіне ерекше тоқталды. Қала маңындағы көлге келушілер санының артуы бұл бағытты дамытуға нақты қажеттілік туғызған.
– Бізде өңірде туризмді дамыту бойынша жоспарлар бар. Жаңа жол демалушылардың келуіне ықпал етеді. Мұнда Алматыдан да, Астанадан да келетіндер бар. Біз кәсіпкерлерді қолдауға және туристер үшін қолайлы жағдай жасауға дайынбыз, – деді Ермағанбет Қабдулаұлы.
Кездесуде тұрғындар денсаулық сақтау саласына қатысты мәселелерді де ортаға салды. Атап айтқанда, қалаға келген жас дәрігерлерді қолдау, баспана мәселесін шешу туралы ұсыныстар айтылды.
– Медицина кадрларын қолдау үшін қолдан келгеннің бәрін жасау қажет. Дәрігерлер кетпеуі тиіс. Тапшы мамандықтардың шағын бейінді мамандары ретінде барлық жас дәрігерлер 8,5 миллион теңгеге дейін көтерме жәрдемақы алды. Бұл – қайтарымсыз қаражат. Пәтер мәселесін де шешуге болады, – деді облыс әкімі.
Жылу маусымына дайындық – қала тіршілігінің маңызды бөлігі. Ермағанбет Бөлекпаев №1 қазандықта болып, жүргізіліп жатқан жөндеу жұмыстарының барысын тексерді. 1974 жылы салынған бұл нысан қаланың негізгі жылу көзі болып есептеледі. Қазір мұнда қазандықтар, жылу алмастырғыштар, экономайзерлер мен аккумуляторлық бак жөндеуден өтуде. Сонымен қатар, 2 шақырым жылу трассасының 1,7 шақырымы жаңартылып, тұрғын үйлерге тартылған 750 метрлік құбырлар ауыстырылған.
– Басты міндет – алдағы жылыту маусымына толық дайын болу. Барлық жұмыстар сапалы әрі уақытылы аяқталуы тиіс. Тұрғындар нәтижесін биыл сезінуі керек, – деп атап өтті өңір басшысы.
Сонымен қатар, облыс әкімінің халықпен кездесу барысында көптеген мәселелер көтерілді. Кездесу аясында Приозерск қаласының әкімі Мансұр Ахметов қаланың әлеуметтік-экономикалық даму көрсеткіштері мен атқарылған жұмыстар туралы баяндама жасады.
– Биылғы жылдың 7 айында бірқатар әлеуметтік-экономикалық көрсеткіштер бойынша оң динамика байқалды. Қалалық бюджетке 839 миллион теңге түсті – бұл өткен жылдың осы кезеңімен салыстырғанда 144 пайыз. Өнеркәсіп өндірісі 22 миллиард теңгеге жетіп, 130 пайызға артты. Бөлшек сауда да өсті. Алайда, инвестиция мен құрылыста төмендеу бар. Бұл – республикалық маңызы бар «Алматы-Астана» тасжолының құрылысы аяқталғанына байланысты. Қалада әлеуметтік тұрғын үймен қамту жұмыстары жүріп жатыр. Биыл 20 пәтер сатып алынып, кезектегі отбасыларға беріледі. Сонымен қатар, алдағы жылыту маусымына белсенді дайындық жүргізілуде: 2 шақырым жылу желісінің 1,7 шақырымы жаңартылды, тұрғын үйлерге 750 метр жаңа құбыр тартылды. Абаттандыру бағытында 1000-нан астам көшет отырғызылып, 2000 шаршы метр тротуар төселді, жол белгілері жаңартылды, суғару жүйелері орнатылды. Көпқабатты үйлердің қасбеттері мен шатырлары жөнделді. Жеңіс бульвары мен Панфилов көшесіндегі үйлерге ағымдағы жөндеу жасалуда. Кәсіпкерлікті қолдау бағытында 6 жас кәсіпкер 12 миллион теңге көлемінде грант алып, 15 тұрақты жұмыс орны ашылды, – деді Приозерск қаласының әкімі Мансұр Ахметов.
Облыс әкімі Ермағанбет Бөлекпаев кездесуде тұрғындармен ашық диалог жүргізіп, қойылған ұсыныстар мен мәселелердің барлығы мүмкіндігінше қаралатынын атап өтті. Кейбір ата-аналар Қарағанды қаласында оқитын балаларына үйге қатынау үшін автобус жүргізу керектігін жеткізді. Осы сынды бірнеше мәселені облыс әкімі зерттеп, халыққа қолайлы жағдай жасауды тапсырды. Кездесуден кейін өңір басшысы жеке қабылдау өткізіп, тұрғындардың нақты сұрақтарына жауап берді.
Нұрдос КӘРІМ,
«Ortalyq Qazaqstan»
ПРИОЗЕРСК
