Ауыл шаруашылығы министрі Қарағанды облысының аграршыларымен кездесті
ҚР Ауыл шаруашылығы министрі Айдарбек Сапаров Қарағанды облысындағы көктемгі дала жұмыстарының барысымен танысты. Ол Осакаров, Бұқар жырау және Абай аудандарының шаруаларымен кездесті.
Айдарбек Сапаров пен Қарағанды облысының әкімі Ермағанбет Бөлекпаев Батпақты ауылындағы «Жаңа-Ай» ЖШС, «Баймырза Агро – 2018», «Астра Агро ЛТД» және Көксу ауылындағы «Шанс» шаруақожалығы егістіктерінде болды. Бұл шаруашылықтардағы жұмыстар жоспар бойынша жүріп жатыр.
Ауыл шаруашылығы министрі фермерлерді қолдау шаралары туралы айтып берді. Аграрлық несие корпорациясы көктемгі егіс және егін жинау жұмыстарын жүргізу үшін облыстың 160-тан астам диқандарын 7,5 млрд теңгеге қаржыландырды, 75 ауыл шаруашылығы тауарын өндірушілер 2,6 млрд теңгеге ҚазАгроҚаржыдан және 201 бірлік ауыл шаруашылығы техникасынан лизингке қолдау алды. Сондай-ақ, мемлекеттен субсидиялар қарастырылған. Қаражат беру механизмі жеңілдетілді.
– 5% субсидиялаудың жаңа моделі басталады. Өтініш беруге және құжаттардың толық пакетін дайындауға болады. Біз субсидияларды қаржы институттарына тікелей аударамыз, ал сіздер бір жылға қаржыландыру аласыздар. Мысалы, осы жылдың мамырынан келесі жылғы мамырға дейін. Сіздер несиені жауып, қайтадан ала аласыздар. Сондай-ақ инфрақұрылым мен жабдық 80% субсидияланады, оның 30%-ы жергілікті бюджет есебінен. Облыста мал шаруашылығы жақсы дамып, сүт-тауар фермалары салынуда. Қолдау болады, мал шаруашылығымен айналысуға шақырамыз, – деді Айдарбек Сапаров.
«Шанс» шаруақожалығы егіншілік пен өсімдік шаруашылығынан басқа мал шаруашылығын дамытуда. Картоппен қатар шаруашылық басшысы Игорь Жабяк жылқы, ірі қара, шошқа өсіреді және бордақылайды. Соңғы жылдары ол көпжылдық шөптерді отырғызумен және құрама жем өндірумен айналысады. Болашақта эспарцет егілген алқаптар ауыл шаруашылығы жануарлары үшін жем-шөп алаңына айналады.
«Астра-Агро LTD» ЖШС-де элиталық тұқымдық картоп өсіруге арналған жылыжайы бар ғылыми зертхана жұмыс істейді. Зертхана қызметкерлері оларды пробиркалардан толыққанды түйнекке дейін шығарады – жылына шамамен 2 мың тонна өсіреді. Кәсіпорын директоры Аманкелді Мұқашевтің айтуынша, аграрлық секторды дамыту үшін заманауи жабдықтары бар осындай ғылыми зертханалар құруды субсидиялау қажет.
Көктемгі егіс облыстың барлық аудандарында басталды. Биыл ауыл шаруашылығы дақылдары 1,1 млн гектарға егіледі, бұл өткен жылмен салыстырғанда 37,6 мың гектарға артық. Бұл ретте дәнді дақылдар 966,3 мың гектарды, майлы дақылдар алқабы 31,0 мың гектарды құрайды. Картоп 11,5 мың гектарға, басқа көкөністер 1,2 мың гектарға отырғызылады.
Суармалы жерлердің ауданы 4,5 гектарға ұлғаяды, сондай-ақ минералды тыңайтқыштарды қолдану арқылы егіс алқаптарын ұлғайту жоспарлануда. Бүгінгі таңда аурулармен, зиянкестермен және арамшөптермен күресу үшін 57,6 мың тонна минералды тыңайтқыштар мен 271 мың литр пестицидтерді жеткізуге келісімшарттар жасалды.
Қарағанды облысының шаруаларына көктемгі егіс үшін 17,4 мың тонна арзандатылған дизель отыны бөлінді.
Қолайлы ауа-райы жағдайында аймақта егіс мамыр айының соңына дейін аяқталады деп жоспарлануда. Көктемгі дала жұмыстарының барысы тұрақты бақылауда.
Материалды әзірлеген Аида РАХЫМҚҰЛОВА
