Ескі Тұзды ауылының тұрғындары тұщы ауызсуға қарық болды
Қазақстан Конституциясы қабылданғанының 30 жылдығы қарсаңында, яғни, 28 тамызда Бұқар жырау ауданы Ескі Тұзды ауылының тұрғындары тұщы ауызсуға қарық болып, мұнда суды модульдік тазалаудың блогі іске қосылды.
Атының өзі айтып тұрғандай, қазірде 22 отбасы тұрып жатқан бұл ауыл топырағы сортаң, тұзды жерге орналасқандықтан оның тұрғындары осы уақытқа дейін кермек татыған суды ішуге мәжбүр болған. Енді осы жаңа қондырғының арқасында олар осында сүзгіден өтіп, тұшытылған ауызсуды пайдаланатын болады.
Ескі Тұздыда суды модульдік тазалаудың блогы ашылуының салтанатында Бұқар жырау ауданының әкімі Ерлан Құсайын мен аудандық мәслихаттың төрағасы Асхат Әли болып, ескітұздылықтардың қуанышына ортақтасты. Таза ауызсуға қолдары жеткен олардың шаттығында шек жоқ.
Ал, келесі 29 тамыз күні ауданның Волковское, Стан шағын ауылдарында да осындай ауызсу беру пунктерін салу жұмыстары аяқталып, ел игілігіне ұсынылды.
Осыменен «Ауыл – ел бесігі» жобасы бойынша Бұқар жырау ауданындағы 68 елдімекеннің 65-інде тұратын халықтың 99 пайыздан астамы таза ауызсумен қамтамасыз етілсе, енді қалған Жаңаауыл мен Бірінші май, Севан ауылдары тұрғындарының да бұл жақсылыққа жетер күні таяу. Мәселен, Бірінші майда осы шаруаларды атқарып жатқан мердігер «Строй Энерджи 2030» ЖШС бүгінге дейін 55 құдықты қазып, орнатып, 2,5 шақырым суөткізгіш тораптарды төсеп, енді сутегі жүйелерін төсеуге кіріскен. Барлығы ауылдағы үйлердің бәріне «Централ Азия цемент» ЖШС Ақтау су айыру магистралынан 4,5 шақырым суөткізгіш тораптар тартылады.
Севан ауылында мердігер «СпецТехСтрой-09» ұйымы келісім бойынша суды модульдік тазалау блогын орнату үшін скважина қазып, контейнер дайындап, сүзгі сорғыларын әзірлеуде.
Ал, Жаңаауылда материалдар (құбырлар, фланцтар, т.б.) сатып алынып, 1,7 шақырым суөткізгіш тораптар төселіп, қосалқы скважинаны бұрғылау бітіп қалған.Су қысымы мұнарасы да тұрғызылды. Жалпы ауыл үйлеріне 3 шақырым суөткізгіш тораптар тартылып, көлемі 25 текше метр су қысымы мұнарасы орнатылмақ.
Бұл жұмыстардың барлығы биылғы тамыз айының аяғына дейін аяқталатын болса, Бұқар жырау ауданының халқы таза ауызсуға еш алаңдамай, 100 пайыз толық қамтамасыз етілді деуімізге болады.
Ержан ИМАШ,
«Ortalyq Qazaqstan»
Бұқар жырау ауданы
