Ауданда автокөпір салынады
Бұқар жырау ауданы Ғабиден Мұстафин ауылында Нұра өзені үстімен автокөпір салынады. Жұмыс барысын ауыл тұрғындары бақылайды. Олар өз ескертулері мен ұсыныстарын Қарағанды облысының әкімі Ермағанбет Бөлекпаевпен кездесу барысында айтты.
Аймақ басшысы жұмыс сапарымен Бұқар жырау ауданына барды. Ботақара кентінің Мәдениет үйінде тұрғындармен кездесіп, аймақты ауыз сумен қамтамасыз ету, жол жөндеу, ЖТҚ (жеке тұрғын үй құрылысы) үшін инженерлік инфрақұрылым салу және үйлерді қалпына келтіру секілді аудан дамуының басым бағыттарын атап өтті.
Дәстүр бойынша кездесу баяндамасыз, сұрақ-жауап түрінде өтті. Ауыл тұрғындарын ең алдымен ТКШ, жол жөндеу және тұрғын үй мәселелері толғандырды. Шалғайдағы ауыл тұрғындары байланыстың нашарлығы мен жайылымның жоқтығына шағымданды.
Биыл ауданда мал шаруашылығын дамыту бойынша пилоттық жоба жүзеге асырылуда. Көкпекті, Белағаш, Тоғызқұдық, Ростов ауылдық округтерінде, Баймырза ауылдық округінде және Жаңаталап кентінде шалғайдағы жайылымдарды пайдалану үшін қажетті инфрақұрылым құрылатын болады. Жоба аяқталу сатысында.
Ғабиден Мұстафин кентінің жергілікті өзін-өзі басқару өкілі Нұра арқылы өтетін автомобиль көпірін салу мәселесін көтерді.
Өңір басшысы тұрғындарға ауыл тіршілігіне жанашырлық танытқаны үшін алғысын білдірді:
– Сіздердің бақылауларыңыздан артық ештеңе жоқ. Жағдайды бақылап отырғандарыңыз жақсы. Ал құрылысқа жауаптыларға келетін болсақ, сіздер халықпен жұмыс істеуді үйренулеріңіз керек, түсініспеушіліктер болмауы үшін бәрін егжей-тегжейлі түсіндіруге тиіссіздер, – деді Ермағанбет Бөлекпаев.
Халықпен кездесуден бұрын аймақ басшысы Доскей ауылында болды. Мұнда «Ауыл – Ел бесігі» бағдарламасы бойынша Мәдениет үйі салынып жатыр және су желілерін қайта жаңғырту жұмыстары іске асырылуда. Қазірдің өзінде 1,8 км су құбыры желісі салынған. Сорғы мен БӨП (бақылау-өткізу пунктіне) арналған шұңқырлар қазылды. Төрт ұңғыма бұрғыланды, сорғы станциясының қоршауы орнатылды.
Сондай-ақ, Қушоқы су құбыры желілерін қайта жаңарту жұмыстары жалғасуда. Ақжар мен Астаховкада су құбырының құрылысы, Трудовой ауылында қайта құру басталды. Аудандық бюджет есебінен Суықсу, Төрткөл, Семізбұға және Үлгі ауылдарын сумен қамтамасыз ету жұмыстары аяқталады.
2023 жылдың соңына қарай ауданның 60 елді мекені немесе халықтың 98,9%-ы орталықтандырылған сумен қамтамасыз етіледі.
Ауыл тұрғындарының өтінішімен Доскей ауылында Мәдениет үйі салынып жатыр. Құрылысы былтыр басталған ғимаратта 200 орындық көрермен залы, үйірме жұмысымен айналысуға арналған кабинеттер болады. Монолитті іргетас құйылды, су құбыры, сыртқы электр желілері тартылды, трансформаторлық қосалқы станция орнатылды. Қазір құрылысшылар монолитті бағандарды құйып жатыр. Мәдениет үйі 2024 жылдың соңында пайдалануға беріледі деп жоспарлануда.
Сонымен қатар, Тұзды, Қушоқы және Ақтөбе ауылдарында клуб жөнделеді. Ауданның жолына назар аударылуда. Ауданның 15 елді мекенінде 50 шақырым жолды жөндеуге қаражат бөлінді. Заречное және Красная Нива ауылдарына кірме жолдар да жөнделеді.
Кездесуден кейін Ермағанбет Бөлекпаев тұрғындарды жеке мәселелері бойынша қабылдады.
Гүлнұр СЕРІКЖАНҚЫЗЫ,
Суреттерді түсірген Жангелді ӘБДІҒАЛЫМ
Ortalyq.kz
