Ақтоғай ауданының экономикалық әлеуеті артып келеді. Бұл туралы аудан басшысы Руслан Кенжебеков өңірлік коммуникациялар қызметінде өткен баспасөз мәслихатында мәлімдеді. Аудан басшысы аймаққа инвестиция тарту және игерілмеген жерлерді қайтаруға бағытталған жұмыстарды тілге тиек етті.
Баяндамашының айтуынша, алты айлық көрсеткіш бойынша ауданның экономика жағынан даму көрсеткіші жоғары. Есепті мерзімде ауданда қолайлы инвестициялық ахуал қалыптасқан. Негізгі қорға тартылған инвестиция көлемі 8 млрд. теңгені құраса, жылдық меже 21,5 млрд. теңге көлемінде. Сонымен қатар, Ақтоғай ауданында жаңа дене шынықтыру-сауықтыру кешенінің құрылысы жоспарлануда.
– Маңызды міндеттердің бірі – жастарды бұқаралық спортқа тарту. Ол үшін жағдай жасаймыз. Сарышаған кентінде ДСК саламыз, Шашубай кентінде дәл осындай нысан үшін жобалау-сметалық құжаттама дайындаймыз. Барлық елді мекендерде биыл баскетбол-волейбол алаңдары, ат спортын, көкпарды дамытуға арналған алаңдар, хоккей корттары және балалар спорттық ойын алаңдары орнатылады. Бұдан бөлек, биылғы жылы ауданымызда ауқымды жұмыстар атқарылу жоспарлануда. Ұлттық жобалар, әртүрлі мемлекеттік және салалық бағдарламалар аясында жеке сектор қаражаты есебінен 10 млрд. теңге қаржы көлемінде құрылыс нысандарын салу, күрделі, ағымдағы жөндеу және елді мекендерді көркейту жұмыстары кең көлемде жүргізіледі, – деді Ақтоғай ауданының әкімі Руслан Кенжебеков.
Сондай-ақ, денсаулық сақтауды дамытуға да жіті назар аударылады. Орталық аурухананың материалдық-техникалық базасын жақсарту үшін қаражат бөлінген. Қызыларай ауылында фельдшерлік-акушерлік пункттің құрылысы басталған. Келесі жылы тағы тоғыз елді мекенде денсаулық сақтау саласының жаңа нысандары салынады деп жоспарлануда.
– Ауданда алдағы жылдары жалпы құны 47 миллиард теңге болатын өнеркәсіп саласында темір және түсті металл өңдеу, мыс штейн және молибден өндіру үшін 5 жобаны жүзеге асыру көзделуде. Сөйтіп 1100-ден астам жұмыс орны ашылады деп жоспарланып отыр. Халықтың әлеуметтік әл-ауқатын жақсарту мақсатында көптеген мемлекеттік бағдарламалар, түрлі қаржы институттары, облыс және аудан әкімінің кәсіпкерлерді қолдау гранттары арқылы ауданға инвестиция тарту жұмыстары шешімін тауып келеді. Мәселен, 2023 жылы аудан бойынша 13 жаңа әлеуметтік нысан ашылып, оған 190 миллион теңге жұмсалмақ, жаңадан 15 жұмыс орны құрылады. Сондай-ақ, ағымдағы жылы Ақтоғай ауылында жеке инвестициялар есебінен салынған 10 пәтерді сатып алу жоспарлануда. Осылайша, кезекті азайтып, 110 отбасының тұрғын үй жағдайын жақсартамыз. Сонымен қоса, ауданда Ақтоғай ауылында тағы төрт 16 пәтерлі тұрғын үйдің құрылысына ЖСҚ түзетілуде. Қазіргі уақытта жоба 2 кезеңге түзетілуде. Екі үйдің құрылысы биыл басталады. 2024 жылға Сарышаған кентінде 40 пәтерді 756 млн. теңгеге сатып алу жоспарда бар, – деді Руслан Кенжебеков.
Айта кетейік, аудан басшысының мәлімдеуінше, бүгінде кезекте тұрғандарды тұрғын үймен қамтамасыз ету үшін Шашубай ауылында 100 пәтерлі көпқабатты үй қалпына келтірілуде. Сондай-ақ, ауданда орталықтандырылған кәріз жүйесінің құрылысы жалғасуда. Жобаны 2024 жылы аяқтау көзделіп отыр.
Нұрдос КӘРІМ,
Ortalyq.kz
