Теміртау қаласында 67 жастағы зейнеткерге бір топ жасөспірімнің шабуыл жасап, қорлық көрсетуі қоғамды бейжай қалдырған жоқ. Электр жөндеушілер ретінде қарияның пәтеріне алдап кіріп, оны соққыға жығып, бұл әрекеттерін бейнежазбаға түсірген олар қазір заң алдында жауапқа тартылуда. Осыған орай, облыс әкімінің орынбасары Әлібек Әлденейдің төрағалығымен кәмелетке толмағандардың істері және олардың құқықтарын қорғау жөніндегі комиссияның шұғыл отырысы өтті.
Комиссия отырысында Теміртаудағы жағдай басты назарға алынып, кәмелетке толмағандар арасындағы құқық бұзушылықтың алдын алу мәселесі талқыланды.
Бұл туралы аймақ басшысы Ермағанбет Бөлекпаев өзінің Facebook парақшасында жариялады.
– Теміртау қаласы әкімінің әлеуметтік мәселелер жөніндегі орынбасарына кәмелетке толмағандарға тиісінше бақылау жасамағаны үшін қатаң сөгіс жариялауды тапсырдым. Сондай-ақ, жасөспірімдер оқыған білім беру мекемелері директорларының орынбасарлары тәртіптік жауапкершілікке тартылды, – делінген жазбада.
Қарағанды облысының полиция департаменті бұл оқиғаны әлеуметтік желілерде бейнежазба жарияланбас бұрын анықтап, барлық кінәлілерді, соның ішінде кәмелетке толмағандарды да ұстаған. Қазір олар уақытша ұстау изоляторында. Одан бөлек, кәмелетке толмағандардың заңды өкілдері тиісті тәрбиелік шараларды орындамағаны үшін жауапқа тартылады және жасөспірімдер профилактикалық есепке қойылды.
– Біз жасөспірімдер агрессиясына сөзсіз алаңдаймыз және болашақта осындай оқыс оқиғаларды азайтуға қосымша шаралар әзірлеуге кірісеміз. Барлық кінәлілер қолданыстағы заңнама аясында жауапкершілікке тартылады. Оқиға бойынша полиция тергеу жүргізуде, – деді Ермағанбет Қабдулаұлы.
Одан бөлек, аймақ басшысы ата-аналардан, педагогтардан балаларды тәрбиелеуге және олардың басқа адамдарға құрметпен қарауын, дұрыс құндылықтарды қалыптастыруға көбірек көңіл бөлуді сұрады.
Ермағанбет Бөлекпаев жасөспірімдерді әлеуметтік қолдау мен алдын алу шараларын күшейту жұмыстарын жалғастыратыны туралы да жазды.
Қарағанды облысындағы балалардың құқықтарын қорғау жөніндегі уәкіл ретінде Ирина Киселева бұған дейін аталған жайт бойынша облыстың білім басқармасында, Теміртау қаласындағы комиссия отырысына қатысқанын айтады. Жасөспірімдердің ата-аналары қатысқан отырыста балалар оқитын мектеп әкімшілігінің өкілдері тыңдалған.
– Осы уақыт аралығында полиция, прокуратура, мектеп және осы жағдайға қатысы бар мекемелермен бірлесіп, үлкен жұмыс атқарылды. Біздің көкейімізде жалғыз ғана сұрақ. Бұған себеп не? Шынында, алдын алу жұмыстарының жеткіліксіздігі. Одан соң, ата-аналардың бала алдындағы жауапкершілігін толық сезінбеуі. Бұл қанша айтылғанымен, баламен сырласып, оның жан сырын білу кемшін. Салдары осы жағдайға алып келді, – дейді Ирина Киселева.
Уәкілдің айтуынша, кейінгі үш айда мыңнан астам ата-ана Әкімшілік-құқық бұзушылық кодекстің 127 бабы бойынша жауапқа тартылып, айыппұл салынған. «Әрине, бала түнімен қараусыз қалса, одан бәрін күтуге болады», – деген уәкіл комиссия отырысынан кейін облыстың білім басқармасы, мектеп әкімшілігі жауапқа тартылып, Теміртау қаласы әкімінің орынбасарына қатаң сөгіс жарияланғанын жеткізді.
– Білім беру мекемелері алдын алу жұмыстарын жүргізеді. Мәселен, оқушылар құқық қорғау органы қызметкерлерімен кездесу барысында заңды түсіндіреді. Енді бұдан былай, жұмыс формасын өзгертеміз. Яғни, сәуір, мамыр айларында құқық тақырыптары бойынша дебаттар, олимпиадалар ұйымдастырылады. Бұлардың барлығы балалардың құқықтық мәдениетін арттыруға ықпал етпек. Ал, ата-аналар бала үшін жауапты екенін білуі тиіс. Біз зорлық болмауына ықпал ететін барлық мүмкіндікті қарастырамыз. Бірақ, ата-ананың көмегі қажет. Президент Қасым-Жомарт Тоқаев Ұлттық Құрылтайдың екінші отырысында ұрпақ тәрбиесінің маңыздылығына тоқталып, бірнеше өзекті мәселелерді көтерді. Мақсат – балаларды жақсы етіп қалыптастыру, – дейді Ирина Киселева.
Оқиға әлеуметтік желілерде қызу талқыланды. Көпшілік ата-аналар мен мұғалімдердің, сонымен қатар, жергілікті биліктің мұндай жағдайлардың алдын алудағы жұмысын сынға алды. Бірқатар сарапшылар бұл оқиғаны «Балалар арасында зорлық-зомбылықтың, әлеуметтік жауапсыздықтың өсуі» деп бағалап отыр.
Теміртаудағы бұл жайт – бүкіл қоғам үшін ескерту. Жасөспірімдердің тәрбиесі – тек ата-ананың ғана емес, қоғамның жауапкершілігі.
Бұл жағдай тиісті органдар мен ата-аналарға сабақ. Ал, тәрбие және бақылау жүйесін қайта қарауға түрткі.
Салтанат ІЛИЯШ,
«Ortalyq Qazaqstan»
Суретті түсірген Жангелді ӘБДІҒАЛЫМ
