Ашық аспан астындағы турнир
Орталық саябақта «САБР» бокс клубы алғаш рет ашық аспан астында турнир ұйымдастырды. Ерекше форматтағы сайысқа 160 жас боксшы қатысып, бақ сынасты. Аймақ жұртшылығы тартысты жекпе-жектің куәгері болды.
Турнирге 2008-2012 жыл аралығындағы жас боксшылар қатысты. IBA ережесі қолданылған бұл сайыста спортшылар 10 ұпайлық жүйе бойынша жұдырықтасты. Тартысты жекпе-жектер жұртшылықтың ыстық ықыласына бөленіп, көрермендердің мерейін өсірді.
Жүлделі болған спортшыларға ақшалай сыйлықтармен қатар чемпиондық белбеу, медальдар, кубоктар табысталды. Ал, балаларын қолдап келген ата-аналар мен жанкүйерлер жас сайыпқырандарға жігер сыйлап, сайыстың көрігін қыздырды.
– Турнир ойдағыдай, сәтті өтті. Жеңіске жеткендер – тоқтап қалмай, әрі қарай шыңдала берсін. Жеңілгендердің де жігері еш мұқалмасын, алда әлі талай бәсеке мен жеңіс күтіп тұр. Ең бастысы – жеткіншектер тәжірибе жинап, достықты нығайтсын. Спортпен шынығып, бос уақыттарын шуақты қылып өткізсе екен, – деді турнир ұйымдастырушысы Сұңғат Талғатұлы.
Жасөспірімдердің спортқа қызығушылығы артып, тәжірибе жинауына осындай турнирлер оң ықпал етеді. Ұйымдастырушылардың айтуынша, бұл бастама дәстүрге айналмақ.
Мағжан ҚҰДАЙБЕРГЕН,
«Ortalyq Qazaqstan»
