Қарақшы құрықталды
Қарағанды полицейлерінің жедел әрекетінің арқасында үй жануарлары дүкені мен гаджет дүкенін тонап кеткен қылмыскер ұсталды.

ПД баспасөз қызметінің мәліметінше, ұры сыртқы есікті бұзып кіріп, кассадан ақша, ноутбук және жануарларға арналған жапсырмаларды ұрлап кеткен. Келтірілген шығын 90 мың теңгені құрады. Жедел-іздестіру шаралары барысында полицейлер 27 жастағы қала тұрғынын ұстады. Күдіктіден жауап алу кезінде ол басқа да ұрлыққа барғанын, гаджет дүкенінің терезесін бұзып кіріп, 4 ұялы телефон, портативті динамик және қолма-қол ақшаны ұрлап кеткенін мойындады. Келтірілген шығын 165 мың теңге. Қазір ұсталған азаматқа қатысты қылмыстық іс қозғалды. Полицейлер оның осыған ұқсас басқа да қылмыстарға қатысы бар-жоғын тексеріп жатыр.
Ілияс ДҮНГЕНБАЙҰЛЫ.